Shillong: Ka jingim ka jong u briew ka donkam ia ka koit ka khiah, ha kaba khlem maka, ka long kaba lehnohei, hynrei na ka liang ka True North, ka shim ia ka kabu ban pynlong ia ki briew ba kin im sngi ha ki kam ia kilan ia ka met , ha kaba kawei ka kam ia kilan dei ka kam jngi.
Kumta ban pynmlien naduh ba dang rit ne wat haduh ba la san la rangbah ka True North ka shim ha ka ia ka sien jam ba kan da pynlong syndon da ka iakob jngi ba la tip ia ka kum ka 1st True North Open Swimming Competition and Masters Meet 2026, ha pung jngi jong ka, ba don ha Lapalang.
Ia kane ka jingiakob kaba ar sngi la sdang ia ka naduh mynta ka sngi naduh ka por mynstep, ha kaba la shem bad iohi ba ki nongwan ban ia shim bynta ka kynthup naduh ki khynnah kiba dang rit wat haduh ki longkmie ki longkpa.
Ban nang pynshlur bad ai mynsiem shuh shuh ia la ki khun ki kti bad ki samla, ka la don ruh ka jingpyniakob jngi wat ia ki longkmie ki longkpa, kaba pynshongkun bha ia kane ka jingiakob.
Ha kane ka sien jam ba nyngkong la don ym duna ia 200 ngut ki nongwan iashim bynta, ha kaba la phiah ne bynta ia ki ha ki kyrdan ne ki rta ialehkai bapher bapher.
Ia ka jingiakob la sdang naduh ka rta jong ki Junior (I-VI) bad ka iaid ter ter shduh ka kyrdan ki ba la heh (Senior) bad haduh ka kyrdan ba la tbit bha (Master).
Ia ka jingiakob jngi la pynlong ha ka kyrdan iakhun jong ka Freestyle, Backstroke, Butterfly, Medley bad Relay.
Ha ka janmiet ba pynkut ia ka sngi ba nyngkong kongsan ba la wan ban ia don lang dei bah Dangsan Khyriem (MPS) ba dei artad u SP City ryngkat bad u rang ialehkai Phutbol ba la pawbha ka Shillong Lajong FC u Phrangki Buam, nalor katta la wan ruh ban sakhi lang da u Swimming Coach ka Meghalaya Swimming Association.
Ha kane ka janmiet la lah ban pynkut ia ka sngi da ka jingsam ia ki takma sha ki nongjop ha ki jingiakhun ba la pynlong ha ka sngi kaba nyngkong.
