SHILLONG : Ka United Democratic Party (UDP) kan ïakhun ïa ka elekshon shiteng samoi sha ka Shillong Lok Sabha bad kan tei biang ïa ka party naduh tynrai hadien ba phra ngut ki MLA jong ka ki la leit pynïasoh bad ka BJP, la ong u General Secretary jong ka party, u Titosstarwell Chyne, ha ka sngi Balang.
“Ngi dang ïaid shakhmat. Mynta ngi dang pynlong ïa ki jingïalang ha ki jaka bapher bapher,” la ong u Chyne, da kaba pynskhem ba ka party ka la sdang lypa ban pynkhlaiñ biang ïa lade.
U Chyne u la phla ba ka jingmih noh jong ki MLA ka la wanrah ïa ka jingduhnong kaba khraw ïa ka party.
“Shisha, ka jingpynïasoh jong ki sha kawei pat ka party ka la ktah shibun ïa ka party. Hynrei haba ki la iehnoh ïa ka party da ka mon jong ki hi, ngim lah ban leh ei ei halor kane,” u la ong.
U la ong ba dei ïa ki nongthep vote ban rai la ki phra ngut ki nongmihkhmat ki la shet kylla ïa ka jingkyrshan ba la ai da ki paidbah ïa ka party riewlum.
“To ai ba ki paidbah kin bishar. Dei ïa ki paidbah ban rai,” la ong u Chyne.
Katkum ka jingong jong u, ka kam kaba hakhmat eh mynta ka long ban pynkhlaiñ ïa ka seng treikam jong ka party, khamtam ha ki phra tylli ki constituency kiba la sah thylli hadien ba ki MLA ki la mih noh.
“Ngi hap ban wad ïa ki nongïalam bad ki kyrtong thymmai ban nang pynkhlaiñ ïa ka party. Ka long ka kamram jong ka party ban lum lang ïa baroh kito kiba don ha kine ki constituency bad kiba dang kyrshan ïa ka UDP, khnang ban trei lang bad pynkhlaiñ ïa ka party. Ngi la sdang ban pynlong ïa ki jingïalang,” u la ong.
U Chyne u la ong ba ka jingkwah ban don ïa ka bor riewlum kaba khlaiñ ka dang don ha ka jylla, bad bun ngut ki briew, kynthup ïa kito kiba la iehnoh ïa ka party mynshwa, ki kwah ban wanphai biang.
“Don bun ngut ki briew kiba kwah ban pynïasoh bad ka party, kynthup ruh ïa kito kiba la iehnoh ïa ka. Ki la pynpaw ïa ka jingkwah ban wanphai biang. Ki briew kiba nga la ïakynduh ki kwah ba ka party riewlum kan long kaba khlaiñ ha ka jylla. Lada ki kwah ïa ka party riewlum kaba khlaiñ, ki hap ban ïarap bad noh synñiang ban pynkhlaiñ ïa ka,” u la ong.
Haba kylli halor ka jingkren jong u Bah Paul Lyngdoh ba u Bah Metbah Lyngdoh u lah ban long u briew uba khatduh tam uba sah ha ka UDP, u Chyne u la ong, “Na ka bynta kata, phi lah ban kylli ïa kane ka jingkylli na jong u hi.”
Haba kren halor ki MDC na Jaintia Hills, u la ong, “Nga tharai ba ki la dep ban pynmih ïa ka jingkren ba kin sah bad ka party.”
Haba kylli la lai ngut na kiba la iehnoh ïa ka party kin dang bteng ne em ban long ki MLA kiba la shah suspend, u la kyntait ban ai jingkren, da kaba ong, “Kata ka shong ha u Speaker ban ai ïa ka rai. Ngam lah ban kren ei ei halor ka rai jong u Speaker. To ngin ap bad peit ïa kaba jia.”
Haba kylli halor ka jingrah jong u Lahkmen Rymbui ïa ka shuki Myntri Sorkar kaba dei bynta jong ka UDP sha ka BJP, u la ong, “Ïa kata ki la ïakren hapoh ka MDA, hynrei ngam dei u dkhot jong ka MDA. Kata ka dei ka kam jong ki MLA ban ïakren, ym jong ngi.”
Haba kylli la u peit ïa ka jingmih noh jong ki MLA kum ka jingpynlehraiñ ne ka jingshet kylla, u Chyne u la kdew ïa ki jinghikai jong u nongïalam barim ka party, u (late) Dr Donkupar Roy.
“Nga ïeng skhem ha kaei kaba u (late) Dr Donkupar Roy u la hikai ïa ngi. U ju ong ba u pyrshah jur ïa ka jingpynïasoh bad kiwei pat ki party da kaba iehnoh ïa ka party ba la jied ïa ki. Kumta, baroh na ngi ngim sngewtynnad ïa kum kine ki jingmih noh,” u la bynrap.
