SHILLONG : Ban pynkut ïa ka jingpynieng kali khlem da don ka rukom ha pdeng jong ka nongbah, ka Sorkar Meghalaya ka la rai ban pynkynriah ïa baroh ki kali jngohkai pyrthei na Assam sha ar tylli ki jaka pynieng kali ba la buh kyrpang, kata ka jaka pynieng kali MUDA ha Keating Road bad ka SRGT.
U Symbud Myntri Rangbah ka Jylla uba khmih ïa ka tnat Transport, u Bah Sniawbhalang Dhar, u la ong ba ïa kane ka rai la shim ha ka jingïalang kaba la long ha ka sngi Balang bad ki ophisar ka tnat Transport.
“Ha kine ki katto katne taïew ba la dep, kane ka mat ka la sah teng. Ngi la ïakren shaphang ka jaka ban buh ïa ki kali jngohkai pyrthei na Assam hapoh ka nongbah. Mynta ngi la rai ban pynïeng ïa ki ha ka thaiñ Keating Road, ha kaba don ka jaka pynïeng kali MUDA,” la ong u Bah Dhar.
U la ong ba ki jingujor ki la nang bun halor ka jingpynïeng kali pathar ha jan ka Secretariat, Wards Lake bad Pinewood Hotel.
“Ngi la ïoh ïa ka jingkyrpad na u Myntri Sorkar Assam, u Atul Bora, uba long u Chairman jong ka Committee na ka liang jong ki, bad ngi la ïoh ruh ïa ka jingtyrwa kaba thoh na ki nongtrei kali jngohkai pyrthei na Assam. Mynta ngi la pynkut ïa ka jingïateh halor kane ka rukom pynïaid,” u la ong.
Katkum kane ka jingthmu, ïa ki kali rit yn pynïeng ha ka jaka MUDA, katba 10 haduh 20 tylli ki bus heh yn shah ban pynïeng ha SRGT.
“Kam itynnad haba ki pynïeng kali harud surok. Kane kan long kaba don ka rukom bad kaba khuid bad ryntih. Ki lah ban pynhiar ïa ki nongleit nongwan ha Secretariat ne Khyndailad, bad nangta leit pynïeng ïa ki kali ha ka jaka ba la buh kyrpang. Ki kali jong ngi ki trai shnong ki la don lypa ïa ki jaka pynïeng kali jong ki,” la ong u Dhar.
Haba kren halor ka jingdawa jong ki nongñiah taksi jngohkai pyrthei na Khasi Hills ban ïoh jaka pynïeng kali ha Guwahati Airport, u Bah Dhar u la ong ba ka Jylla ka la ïakren halor kane bad ka Adani Group, kaba pynïaid ïa katei ka kad liengsuiñ.
“Ym pat dep ïa ka kam haduh mynta. Ynda la dep pynkhreh ïa ka jaka pynïeng kali, kin sa buh kyrpang ïa ka jaka na ka bynta jong ngi,” u la ong.
U Bah Dhar u la ong ruh ba ka jaka pynïeng kali ha ISBT ka dang plie na ka bynta baroh, bad u la pynskhem ba ym don kano kano ka jingkhanglad ïa ki kali jngohkai pyrthei ban leit sha ki jaka jngohkai.
“Ki lah ban leit sha kano kano ka jaka ba ki kwah — Sohra, Dawki. Mano ban khang ïa ki?” u la ong
