SHILLONG: Ki paidbah na ka shnong Tamu, West Jaintia Hills, ki la mih paidbah ban pynpaw ïa ka jingkyrshan kaba borbah ia u kyrtong ka NPP, u Dr DRL Nonglait, ha ka jingïalang ialap elekshon ba la don lang u nongialamnba Rangbah ka NPP ba dei ruh u Symbud Myntri Rangbah ka jylla, u Bah Sniawbhalang Dhar.
U Bah Dhar u la ai jingïaroh ïa ka jingshongshit jong ki paidbah kiba la wan sha kane ka jingïalang, watla ka seng kam shym la pynbna paidbah ïa ka. U la pynpaw ruh ïa ka jingsngewkmen halor ka jingieit bad jingkyrshan jong ki paidbah ïa u kyrtong ka NPP.
U la kyntu ïa ki paidbah ka Tamu bad ka Jaintia Hills baroh kawei ba kin ai ïa ka jingkyrshan kaba pura ïa u Dr DRL Nonglait ha kane ka ilekshon shiteng samoi ka ban sa long shen.
U Bah Dhar u la ong ba ka jingjied ïa u MP na ka seng synshar kan pynsuk ïa ka jingïatreilang hapdeng ka Sorkar Jylla bad ka Sorkar Pdeng, khnang ban pynsted ïa ka jingpyntreikam ïa ki kam pynroi bad ban wad ïa ki lad ban pynbeit ïa ki mat kiba dang sahteng.
Napdeng kine ki mat, u la kdew ïa ka jingithuh ïa ka ktien Khasi ha ka Khyrnit kaba Phra jong ka Riti Synshar jong ka Ri India, ka jingpyntreikam ïa ka Inner Line Permit (ILP), bad ka jingpynkhlaiñ ïa ka roi ka par ha baroh ki liang.
U la pynpaw ka jingkyrmen ba ka jingkyrshan jong ki paidbah kan iarap ïa u Dr DRL Nonglait ban mihkhmat hok ïa ki paidbah bad ban pynsngew ïa ki jingeh bad ki jingdonkam jong ki ha Parliament.
