SHILLONG : U Symbud Myntri Rangbah ka Jylla uba khmih ïa ka tnad Home (Police), u Bah Prestone Tynsong, ha ka Sngi Palei u la pynpaw ba um sngewthuh ïa ka jingdawa jong ka Liang Pyrshah, ka Voice of the People Party (VPP), ban ai jingpynshai halor ka jingpynslem jong ka Sorkar ban thung ïa u Director General of Police (DGP) ba pura, hadien ba ka UPSC ka la phah biang ïa ka jingpynkynmaw kaba ar sha ka Sorkar Jylla.
“Kaei ka jingpynslem? la kylli u Bah Tynsong.
Haba kylli halor ka jingkynnoh ka VPP ba ka Union Public Service Commission (UPSC) ka la hap ban phah haduh ar sien ïa ka jingpynkynmaw sha ka Sorkar Meghalaya halor ka jingthung ïa u DGP ba pura, u Bah Tynsong u la ong ba ka Sorkar ka bud ïa baroh ki rukom treikam bad ki kyndon ba la buh.
“Watla ka UPSC ne ka Ministry of Home Affairs ka ong aiu, ngi dang bud ïa baroh ki rukom treikam. Lada ki kwah ban tip kham bniah, nga kwah ban kyrpad ïa ki ba kin wan ïakynduh ïa nga hi dalade,” u la ong.
U Bah Tynsong u la bynrap ba ka long kaba kham dei ban ïakren markhmat ban ïa kaba pynmih ïa ki jingkylli halor kine ki kam sorkar lyngba ki lad pathai khubor.
“Wat lada ki kwah ban tip, kam donkam ban leit sha ki lad pathai khubor kumne. To kin wan shong ïakren bad nga halor ka miej, bad ngan batai ïa ki ïa ka jingshisha bad ka jinglong jingman jong ka kam,” u la ong.
