SHILLONG : Ka Hynñiewtrep Youths’ Council (HYC) ka la pynpaw ïa ka jingsngewkhia kaba jur halor ka jingbym don ka jingpynpoi um dih sha ka shnong Kher Jatap bad Lum-u-Smon hapoh ka Shella Sub-Division la saw haduh san bnai, watla kine ki shnong ki la shah kynthup hapoh ka skhim Jal Jeevan Mission (JJM).
Ha ka shithi ba la aiti sha u SDO jong ka tnat Public Health Engineering (PHE), Shella, ha ka sngi Palei, ka HYC Shella Area Unit bad Jatap Unit ki la ong ba ki nongshong shnong ki mad ïa ka jingeh kaba khraw namar ka jingthut jong ka jingpynpoi um.
“Ki nongshong shnong jong ka Kher Jatap bad Lum-u-Smon kim shym la ïoh um lyngba ka skhim JJM la 4–5 bnai mynta. Kane ka jingbym ïoh um kaba la slem ka la pynlong ïa ki ban mad ïa ka jingeh kaba khraw ban pynbiang ïa ka um dih bad kiwei pat ki jingdonkam ha ka jingim ba man ka sngi,” la ong ka HYC.
Ka Council ka la ban jur ba ka um dih ka dei ka jingdonkam kaba kongsan tam ha ka jingim bad ym dei ban pynduu ïa ki nongshong shnong iane ka jingshakri kaba donkam.
Ka HYC ka la kdew ruh ba ka jingthmu ba kongsan jong ka JJM ka long ban pynpoi um sha ki longïing, hynrei lada ki shnong ki hap ban sah khlem um la bun bnai, kata ka pynlong ïa ka jingthmu jong ka skhim ban ym urlong.
“Haba don ka skhim kum ka JJM ban pynbiang um, hynrei ki paidbah ki dang hap ban mad ïa ka jingeh la bun bnai, kane ka pynmih ïa ki jingkylli halor ka jingtreikam bad ka jingpeit bad pynbha ïa ki kor pynpoi um hapoh kane ka skhim,” la ong ka Council.
Haba dawa ïa ka jingshimkhia mardor, ka Council ka la kyntu ïa u ophisar ba peit ïa ka tnat PHE ha Shella Sub-Division ban shimkhia ïa kane ka kam, ban leit jurip ïa ki shnong Kher Jatap bad Lum-u-Smon, ban lap ïa ki daw jong ka jingthut ka jingpynpoi um bad ban maramot ïa ki bynta kiba la sniew.
Ka Council ka la dawa ruh ban pynbiang ïa ka um ha ka por ba dang pynbeit ïa ka jingeh bad ban pynlong ïa ki briew kiba donkti ban kitkhlieh halor kane ka jingthut.
“Ngi la kyntu ruh ba dei ban pynioh biang ïa ka jingpynpoi um khlem jingthut, bad lada ka jingmaramot kaba pura kan shimpor, dei ban pynbeit ïa ki lad ban pynpoi um shipor lyngba kiwei pat ki rukom tad haduh ban da lah ban pynbeit pura,” la ong ka Council.
“Ngi kyrmen ba phin shim ïa kane ka kam kum ka kam kaba kyrkieh bad pynshai sha ki paidbah halor ki daw jong ka jingthut bad ki sienjam kiba donkam ban pynbeit ïa ka, khnang ba ki nongshong shnong kin lah ban ïoh biang ïa ka um kaba long ka jingdonkam man ka sngi jong ki,” la bynrap ka shithi, kaba la soi da u B. Natep, Vice President jong ka HYC Shella Area Unit, bad u P. Shongwan, President jong ka HYC Jatap Unit.
