SHILLONG : Ka jingïakren hapdeng ka Sorkar bad ki nongpyrshah halor ka projek Shillong Ropeway kam shym la poi sha kano kano ka jingïamynjurlang ha ka sngi Palei, ha kaba ka Joint Action Committee (JAC) Against Shillong Ropeway Project ka la pynskhem ba kan bteng ïa ka jingïakhih tad haduh ban da sangeh noh ïa ka projek ha Lum Shyllong.
Hadien ka jingïalang kaba la pynïaid da ka Commissioner & Secretary ba khmih ïa ka tnat Tourism, ka Kong R.M. Kurbah, ka Secretary jong ka JAC, ka Dr. Linda Marbaniang, ka la ong ba ka Committee ka la rai ban bteng ïa ka jingïakhih jong ka.
“Ngim shym la poi sha kano kano ka rai kaba ïamynjurlang ha ka jingïalang bad ka tnat Tourism. Kum ka JAC, ka khubor jong ngi ka long kaba shai bad kaba skhem — ngin ym sangeh ïa kane ka jingïakhih. Ngi kwah ba dei ban sangeh noh mardor ïa ka projek ropeway,” la ong ka Dr. Marbaniang.
Ka la ong ba ka Shillong ka donkam ïa ka jingshngaiñ ha ka jingpynbiang um, ym ïa ka ropeway ha ka jaka kaba pynmih bad lum ïa ka um.
“Ki paidbah ka Shillong ki kwah um. Ngim kwah ïa ka ropeway ha Lum Shyllong. To pynkynriah ïa ka sha kawei pat ka jaka ha kaba ki briew ki donkam ïa ka. Ka jingdonkam kaba kyrkieh jong ngi hangne ka long ka um, ym ka ropeway,” ka la ong.
Haba kynnoh ïa ka jingjulor jong ka mariang, ka la ong, “Ki la pynjulor ïa u Lum Shyllong bad pom ïa ki dieng. Ngi dei ban peit ïa ka jingshisha. Ka Meghalaya ka don ka jingduna slap haduh 60 percent. Kane ka dei ka jingshisha kaba paw. Ngim donkam ban hikai ïa uno uno halor kane.”
Haba pynpaw ïa ka jingsngew jong ki paidbah, ka Dr. Marbaniang ka la ong ba ki nongshong shnong na Laban Pyllun ki kyrpad ïa ka sorkar ban sngap ïa ka jingud jong ki.
“Ngi na Laban Pyllun ngi kyrpad ïa ka sorkar ban sngap ïa ngi. Ngi la mad ïa ka jingeh bad ki khun jong ngi bad ki pateng ban wan kin mad ruh ïa kane. Nangno ngin ïoh ïa ka um, ka lyer kaba khuid bad ki dawai kynbat na ki khlaw jong ngi? Hangno ki mrad kin shong? Sngewbha sngap ïa ngi, ngim kwah ïa ka ropeway ha katei ka jaka,” ka la ong.
Ka JAC ka la khot ïa ka rally paidbah kaba jai jai ha ka 17 tarik Risaw, kaba sdang na Last Stop, Laban bad kut ha ka jaka Sericulture Farm ha Lum Shyllong.
Ka Dr. Marbaniang ka la buh ruh ïa ka jingkylli halor ka jingbym pynlong ïa ka public hearing kaba donkam shuwa ban sdang ïa ka projek.
Haba kyntait ïa ki jingkam ba ka catchment area kan ym shah ktah, ka la ong, “Lada pom ïa ki dieng, ym don slap; bad lada ym don slap, ym don um — kane ka dei ka jingshisha kaba suk ban sngewthuh. Ka Shillong kam ju long kaba shit kumba ka long mynta. Ka jinghap slap kaba neh 7 haduh 9 miet lynter, kaba ngi ju ïohi mynshuwa, ka la jah noh namar ka jingpom ïa ki khlaw.”
Haba pyrshang ban ïoh ïa ka jingpynshai na ka Commissioner & Secretary jong ka tnat Tourism, ka Kong R.M. Kurbah, kam shym la kwah ban ai jingkynthoh halor ka jingmih na ka jingïalang.
