Shillong : Ka KSU mynta ka sngi ka la leit ban aiti da ka Dorkhas sha baroh ki 36 ngut ki Nongmihkhmat Paidbah ka Bri Hynniewtrep kum shibynta ban pynbor ia kine ki Nongmihkhmat ban kren bad pynsngew ia ki 5 tylli ki mat jingdawa kiba ka KSU ka la buh ha khmat ka Sorkar Jylla khamtam ba ka Dorbar Synrai jong ka Meghalaya Legislative Assembly kan sdang naduh ka 24 Tarik mynta u Bnai.
Katkum ka kyrwoh ba la phah da u Assistant General Secretary ka Seng, samla Pynshai Rani la iathuh ba nalor ki 36 ngut ki MLA na Ri Lum Khasi ka seng kan pyrshang pynpoi ruh sha ki 24 ngut ki MLA ka Ri Lum Garo.
Kane ka jingleit aiti ia kine ki Dorkhas sha kitei ki nongmihkhmat la ia shim bynta da ki Dkhot na ki Unit bad Circle kiba hap ha ki Konstitwensi kaba ki MLA ki mihkhmat.
Haba kren halor kane ka jingaiti ia ki dorkhas, ka kyrwoh ka ong ba ia ki MLA la jied da ki paidbah bad ka dei ka kamram jongki ban kren ia ki mat ki jura kiba ktah ia ka lad ioh kam ioh jam bad ia ki jingeh jong ka Jaitbynriew ruh baroh kawei. Kumta ka seng ka ieh ha ka jingstad jong ki Nongmihkhmat ia ka kamram kaba ki dei ban leh.
Shuh shuh la ong ba ka Seng kan ym shong kli kti ban iakhih ia kitei ki mat jingdawa katba ka sorkar Jylla kam pat lah ban pyntreikam pura ia ki jingangnud kiba ka seng ka la buh ha khmat ka Sorkar.
Ha kawei pat ka liang ka seng ka la pyntip ba ki la shim ia ka rai ban pynlong ia ka Sit in demonstration lane ka jingshong kyllain̈ Mungor la 24 tarik mynta u bnai ha u Mot dur ba shi rynn̈ieng jong u Woh Kiang Nangbah mar pyrshah bad ka Shillong Civil Hospital naduh ka por 11 baje mynstep. Bad ha ka sngi ba bud pat kata ka 25 tarik yn pynlong ia ka Sit in Demonstration sa ha ki 7 tylli ki District jong ka Bri 7 Trep.
Ha kaba ia dei bad lashai ka sngi ka 22 tarik ka Seng kan ym buh ia kino² ki prokram jingia khih khnang ba kan ym pynwit ia ki Samla ki ban ia khun ia ka Eksam LDA ba la pyniaid da ka MPSC.
