SHILLONG : Ka Sorkar India ka la pynpaw ïa ka jingsngewhun halor ka jingpyrshang jong ka Meghalaya ban pyntreikam biang ïa ka kam tih dewiong da ka juk saian lane ka scientific mining, bad la khmih lynti ba ki ophisar na ka sorkar pdeng kin wan jngoh ïa ka jylla ha u bnai Risaw ban bishar ïa ka jinglah ban pyntreikam ïa kane ka rukom tih dewïong.
Haba kren bad ki lad pathai khubor ha ka sngi Palei, ka MLA jong ka Sutnga-Saipung MLA, ka Kong Santa Mary Shylla ka la ong ba ha kane ka sngi ka la don ka jingïalang ba la pyniaid da ka Rupinder Brar, Additional Secretary, Ministry of Mines, Government of India. Ha kane ka jingïalang ki la don lang ki ophisar jong ka Directorate of Mineral Resources (DMR), Government of Meghalaya, u Law Secretary Bah CVD Diengdoh bad ki nongmihkhmat jong ka CMPDIL.
“Ka jingïalang ka la long kaba ïaid beit namar ki ophisar jong ngi ki la buddien ïa ka kam scientific mining ha Meghalaya. Ngi la ai ïa ka presentation jong ngi, bad ka CMPDIL ruh ka la pyni ïa ka jingbishar halor kaei kaba lah ban pyntreikam, khamtam ha East Jaintia Hills. Ki ophisar ki la pynpaw ïa ka jingsngewbha bad ki don ka jingthmu ban wan jngoh ïa ka Meghalaya ban ïohi hi ïa ka rukom treikam jong ka mining ha ka jaka,” ka la ong.
Ka la ong ba kane ka jingïalang ka long ka jingïabuddien ïa ka memorandum kaba la aiti mynshwa da ma ka ryngkat bad u Myntri Rangbah, u Conrad K Sangma, sha ka Sorkar India ha nongbah Delhi dang shen.
“Ha ka memorandum ngi la pynpaw ïa bun tylli ki mat, hynrei ka mat kaba kongsan ka long ban pynrit ïa ka jingheh jong ka jaka kaba donkam na ka bynta ka scientific mining. Ka open-cast mining kam long kaba lah ban pyntreikam ha Meghalaya namar ka rem dor bad ka lah ban wanrah ïa ka jingktah ïa ka mariang,” ka la ong.
Ka la ong ruh ba ka rukom long trai jaka ha Meghalaya ka bun ba ka dei jong ki riewshimet bad kham duna ki jaka ba dei jong ka shnong ne ka imlang sahlang. Kumta, ka la ong ba dei ban pyrkhat ruh ïa ka lad ban ai license sha ki trai jaka shimet na ka bynta ka scientific mining.
Ka Shylla ka la ong ba ki paidbah jong ka jylla, khamtam ha ki thaiñ tih dewïong, ki la shah ktah bha ha ka liang ka ïoh ka kot namar ka jingpynsangeh ïa ka tih dewïong, bad ka sorkar ka dang trei shitom ban wanrah biang ïa ka jing tih dewïong kaba la pynïaid katkum ki kyndon.
“Naduh u snem 2019, kane ka dei ka sien kaba nyngkong ba ka Sorkar India ka la pynpaw ïa ka jingsngewbha kaba jur halor kane ka mat. U Myntri Rangbah u dang trei shitom sngi bad miet na ka bynta ki paidbah bad u dang buddien ïa kane ka mat, bad ngi ruh ngi kyrshan ïa u ha baroh ki liang,” ka la ong.
Ka Shylla ka la bynrap ba ka Sorkar Pdeng kam pat pynbeit ïa ka tarik kaba thikna jong ka jingwan jngoh ïa ka Meghalaya, hynrei la khmih lynti ba ka kynhun kan wan ha u bnai Risaw.
