Shillong: Ka lympung iakob ialehkai Mawpoin, kaba dei kawei na ki jingialehkai tynrai, ba la tip ia ka kum ka 1st Open Inter School & Inter College Mawpoiñ, ba la pynlong ia ka d da ka Seng Samla Seng Khasi Kmie, ha Madan Heh Stadium, Mawlai Phudmuri ka la poi noh sha kaba kut da ki phainal kiba la lah ban pynlong hynne ka sngi.
Haba phai sha ka jingiakhun kaba dei naka bynta ki skul, na ka liang ki khynnah shynrang, ka nam lahduh la rah ia ka da ka Seng Khasi Riwar Mihngi HSS, Pynursla hadien ba ka la lah ban pynliem noh ia ka Seng Khasi Hr S.S, Jaiaw, katba na ka liang ki kynthei, ka skul kaba la ioh ba kan rah ia ka nam lahduh dei ka Seng Khasi SS Umkseh Tyrsad hadien ba ka la lah ba kan pynliem noh ia ka Seng Khasi HSS, Shillong.
Haba phai pat sha ka jingiakhun naka bynta ki kolej, naka liang ki kynthei, ka nam lahduh la rah ia ka da Synod College hadien ba ka la pynliem noh ia ka Ri War College, Pynursla, bad na ka liang ki shynrang, ka nam lahduh ka leit sha ka Seng Khasi College hadien ba ka la lah ban pynliem ia ka UCC College.
Kongsan ba la don lang ha ka por ba pynkut dei u Abhilash Baranwal, IAS, Deputy Commissioner, East Khasi Hills District bad sakhi lang ruh da u President ka Seng Khasi Kmie Rgh O. Pyngrope, bad kumjuh ki dkhot ka JPK bad Seng Kynthei.
Kumban shu pynkynmaw ba ia kane ka lympung la leit bna plie ia ka da u Symbud Myntri Rangbah ka jylla bah Prestone Tyngsong, ha ka 12 tarik jong ka taiew.
