SHILLONG : Hapdeng ka jingphriang khubor kaba jur ba 9 na ki 12 ngut ki MLA jong ka ki la pynkhreh ban leit pyniasoh sha ka BJP, ka United Democratic Party ha ka sngi Palei ka la ong ba ki khyrdop jong ka party ki dang plie na ka bynta ka jingïakren bad ka long ruh kaba kloi ban pdiang ia ka jingkylla ha ka jingialam lada donkam.
U General Secretary jong ka UDP, u Titosstarwell Chyne, u la ong ba ka party kam pat ioh ia kano kano ka jingpyntip kaba shai shaphang ka jingphriang ki khbuor ba bun ki MLA kin mih noh na ka party.
“Ym don kano kano ka shithi ne ka jingtip kaba la wan na kino kino ki MLA haduh mynta ka sngi,” u la ong.
U la ong ba u la phone bad iakynduh ia ki MLA bun sien, hynrei um shym la ioh ia kano kano ka jubab kaba shai.
“Ban iakynduh ia ki nga la iakynduh bun sien bad ban phone ruh nga la phone, hynrei kim shym la ai ia ka jubab kaba shai la kin leit pyniasoh sha kiwei pat ki party. Kim shym la kyntait ne pynthikna,” u la ong.
U bah Titos u la ong ba ka long kaba suk ban kynnoh ia u President jong ka party halor kane ka jingjia, hynrei ki mat kiba mih halor ka party ki dei ban iakren da ka lynti kaba shai.
“Lada don kano kano ka jingeh kaba iadei bad nga ruh bad lada ngam long shuh uba bit kum u General Secretary, phi lah ban pynpaw beit ia kata. Ka kyrdan President ne General Secretary kam dei ka nongkynti shimet, hynrei ka long na ka bynta ka jingmyntoi jong ka party. Ka jingkhang ka long kaba plie ban iakren halor kino kino ki jingeh,” u la ong.
U la pyntip ba la khot pynlong ia ka jingïalang kyrkieh jong ka Central Executive Committee (CEC) ha ka sngi Thohdieng, kaba hap ruh bad ka sngi seng jong ka party.
“Ngi la pyntip sha baroh ki MLA, MDC, ki President, ki Secretary bad ki dkhot jong ka CEC ban rakhe ia ka sngi seng bad ban iakren halor ki mat bapher bapher,” u la ong.
Haba kylli la yn kyrpad ia u Bah Metbah Lyngdoh ban hiar na ka kam President, u la ong, “Lada u Bah Metbah ne nga hi ngi dei ka daw ba ki kwah ban mih na ka party, nga la kloi ban ong ia u ba un hiar khnang ba ngin lah ban pynbeit thymmai bad pynkhlain biang ia ka party. Hynrei ban dawa ia ka jingpynhiar khlem kano kano ka daw kam long kaba dei.”
Haba kylli la ka jingbymhun ka mih na ka jingpynkylla Myntri dang shen, u la ong ba kata ka long shabar ka jingtip jong u bad ka dei ka bor bad ka rai jong u Myntri Rangbah.
