SHILLONG NAITUNG 15: U kyrtong ka National People’s Party (NPP) u Dr DRL Nonglait u la bteng ban leit ïakynduh ïa ki paidbah ban pan jingkyrshan na ka bynta ka ilekshon MP shiteng samoi ha kaba ki nongïalam ka seng ki la synran lang ïa u ha ka jingleit sha Mawlyngkhung, ka shnong kaba hap ha Mawhati konstitwensi, Ri-Bhoi district ha ka 14 tarik u Naitung, 2026.
Hapdeng ka jingsynran lang u nongïalam ka NPP uba dei ruh u Symbud Myntri Rangbah, u Bah Sniawbhalang Dhar lem bad ki Myntri Sorkar, ki MLA, ki MDC bad kiwei ki nongïalam, u Dr Nonglait u la ïoh ka jingpdiang sngewbha ha Mawlyngkhung ha kaba ki paidbah na ki shnong ba marjan bad ka shnong Mawlyngkhung ki la tuid ban sakhi ïa ka jingïalang khamtam ban ïohsngew ïa ka jingkren jong u Dr. Nonglait.
Kiba la synran ïa u Dr. Nonglait, ki kynthup ïa u Myntri Sorkar u Bah Sosthenes Sohtun, u MLA ka Mawhati u Bah Charles Marngar, u MLA ka Umsning u Dr. Celestine Lyngdoh, u MLA ka Umroi u Bah Damanbait Lamare, nalor kiwei pat ki nongïalam bad nongkitkam ka NPP.
Ha kane ka jingïalang, u Dr. Nonglait u la ai jingkren bad kyrpad ïa ki paidbah ka thaiñ ban ai ka jingkyrshan ha kane ka ilekshon MP shiteng samoi na Shillong Parliamentary konstitwensi kaba yn sa pynbna da ka Election Commission ka ri India.
U la pynsngew sha ki paidbah ba ka Jylla ka dei ban nang kiew ha ki liang baroh, bad ki shnong ki thaw bad ka Jylla ka donkam shibun ki kam pynroi ki ban kyntiew ïa ka jylla bad ïa ki nongshong shnong ha kaba ma u lada shahjied kum u MP, un ïatreilang bad ka Sorkar ban shim ki lad ki lynti na ka bynta ban pynurlong ïa ki jingangnud jong ki paidbah.
“Ym lah ban kular ba ngi lah ban weng lut ïa ki jingeh baroh, hynrei donkam ban shim ki sienjam bad thaw ki lad ki lynti kumno ban pynurlong ïa ki jingangnud jong ki khun samla bad ki nongshong shnong,” u la ong.
U Dr. Nonglait u la ong ruh ha kane ka juk kaba mynta, ka jylla ka donkam ïa ka saiñ pyrthei kaba lah ban ïohi jngai na bynta ka roi ka kiew ki shnong ki thaw bad ruh ban pynjan ïa ki sor sha ki nongkyndong, khnang ba kan pynsuk ïa ki paidbah, la ka long lyngba ki ïew ki hat, ki jaka pule bad kiwei jingdonkam.
La ïoh ruh ka jingkren na u Bah Sniawbhalang Dhar, uba la pynsngew sha ki paidbah ba ka NPP ka long kaba donbok ba u Dr Nonglait u long u kyrtong namar u dei u briew uba don ka kyrdan kaba heh bad u long uba sngewrit bad u nongïalam uba trei shitom.
U la ong ba ka jingwan ki paidbah sha ka jingïalang ka pyni ba ki kwah ban kyrshan ïa u Dr Nonglait bad pan ka jingkyrshan na ki paidbah ban kyrshan ïa une u kyrtong ha ka ilekshon MP shiteng samoi ka ban sa long shen.
