SHILLONG NAITUNG 15: U Symbud Myntri Rangbah ka Jylla, u Bah Sniawbhalang Dhar u la ong ba ka Sorkar MDA ka bunkam ban trei, ym ban bun ktien, bad kum ka Sorkar, lada ka trei ne kam trei ruh kan shah kren shah kynthoh beit.
Haba kren shaphang ka jingtreikam ka Sorkar MDA ha ka jingïalang ha Mawlyngkhung na bynta u kyrtong MP, u Dr DRL Nonglait, u Bah Dhar u la ong ba ka Sorkar hapoh ka jingïalam u Conrad K Sangma kum u Myntri Rangbah, ka bunkam ban trei ym ban bun ktien, bad lada ka Sorkar kam shah kren, ka dei ka Sorkar thiah sngi.
“U diengsoh uba mih ki soh, ki briew ruh ki peit khmat bha, ban ïa u diengsoh bym don ki soh. Kumjuh ruh ka Sorkar kaba trei, ka shah peit khmat bad shah kren. Namarkata, lada trei ne khlem trei ruh, kin don beit kiba kynthoh ïa ka Sorkar ha ka synshar paidbah,” la ong u Bah Dhar.
U la ïaroh ïa ka Sorkar MDA namar ka jingtreikam jong ka ha kine ki 8 snem tam ha kaba ka mang tyngka ruh ka la kiew na ka T. 9,000 klur sha ka T. 30,000 klur.
Haba kdew katto katne ki kam pynroi ha Mawhati konstitwensi, u la ong ba ka jingmang pisa ka Sorkar na ka bynta ki surok tang ha Mawhati ruh ka la kot sha T.250 klur nalor ka jingmang pisa ban tei ïa ka ophis Mawhati Block kumba T.4 klur tam.
U ai ruh ka jingïaroh ïa ki MLA ka Ri-Bhoi khamtam na Mawhati bad Umsning kiba shah beiñ shah khoh tang namarba ki ïatreilang na ka bynta ban kyntiew ïa ka konstitwensi jong ki, na bynta ka Ri-Bhoi bad ka Jylla.
La ïoh ruh ka jingkren na u Myntri Sorkar, u Bah Sosthenes Sohtun, ki MLA ba kynthup ïa u Dr. Celestine Lyngdoh, Damanbait Lamare bad u Bah Charles Marngar, kiba la kyntu ïa ki paidbah kiba la poi sha katei ka jingialang lem bad ïa ki paidbah ka Ri Bhoi baroh kawei ba kin ai ka jingkyrshan pura ban pynjop ïa u Dr Nonglait.
