Shillong, Naitung 17 : Ka Sorkar Jylla kan wanrah ia ka resolution ban pyrshah ia ka jingtih uranium ha Jylla ha ka Dorbar Synrai jong ka Iing Dorbar Thaw Ain ka Jylla, ka ban long ha u bnai Nailar, ong u Myntri Rangbah Conrad K Sangma ha ka sngi Thohdieng.
Haba kren sha ki lad pathai khubor, u Conrad ula pynpaw ba ka Iing Dorbar kan hap ban iakynduh hashuwa ka 27 tarik Nailar ban pynbiang ia kaei kaba la buh da ka Riti Synshar ka Ri kaba long hynriew bnai hapdeng artylli ki dorbar.
“Hooid, ia ka resolution yn sa wanrah ha ka Dorbar Synrai ban wan jong ka Iing Dorbar Thaw Ain, ka ban long ha u Nailar. Ka 27 tarik Nailar ka dei ka sngi kaba dei ban khot ia ka Dorbar namar ka hynriew bnai kan kut ha ka 27 tarik u Nailar” ong u Myntri Rangbah.
U Conrad ula ong ba ha kane ka dorbar Synrai jong ka Iingdorbar, ka Sorkar kan sa wanrah ia kane ka resolution.
