Shillong : U General Secretary ka UDP Bah Titosstarwell Chyne, u la ong ba u MLA ka West Shillong, Paul Lyngdoh, u dei ban pynpaw markhmat ha ka party ïa ki jingeh ne kino kino ki mat kiba iadei bad ka party ha ka jaka ban pynpaw paidbah ia ka shabar.
U Bah Chyne u la ong ba um sngewthuh balei ba u Bah Paul Lyngdoh u dang iai kylli bad kren halor ka rukom ialam ia ka party, khamtam hadien ka jingkylliang shuki Myntri.
“Lada u Bah Paul Lyngdoh u don ka jingeh shisha halor kane ka mat, u dei ban wan sha ki jingialang ka party bad pynpaw ïa ka jingmut jong u hangta,” u la ong. Katkum ka jingong u Chyne, ka party ka la khot ïa ki jingialang bunsien, hynrei uBah Paul Lyngdoh um shym la wan.
Shuh shuh u ong ba tang ha ka jingialang CEC kaba khatduh u Bah Paul u la wan, bad kata ka long kawei ka jingialang ha baroh shisnem.
Kane ka jingkren u Chyne ka wan hadien ba u Paul Lyngdoh u la kren paidbah dang shen, da kaba kylli bad pynpaw ïa ka jingbym sngewïahap jong u halor ka rukom ialam ia ka United Democratic Party (UDP).
