Shillong : Ka jingïakynad hapoh ka United Democratic Party (UDP) ka nang paw pyrthei hadien ba katto katne na ki 8 ngut ki MLA ka UDP ki la pynlong da ki jingialang paidbah ban pan ia ka jingmynjur ha shwa ban leit pyniasoh noh sha ka BJP.
Kumta, halor kane na ka liang ki nongialam ka UDP ki dang pyrkhat ban ban shim ki sienjam ban pan jingpynshai bad ruh ban shim ki sienjam halor kine kiei kiei baroh pyrshah ïa ki.
U General Secretary ka UDP, Titosstarwell Chyne, u la ong ba ka disciplinary committee bad ka State Parliamentary Board kin sa shong jingïalang ban rai ïa kaei kaba dei ban leh.
Haba la kylli lada lah ban weng noh ïa ki MLA na ka party, u Bah Chyne u la ong ba um lah ban rai marwei. Ka party baroh kawei kan hap ban rai lang halor kane.
U la ong ruh ba lah ban ai show-cause notice ne leh ïa kiwei pat ki sienjam, hynrei ym pat lah ban ong thik mynta namar ka State Parliamentary Board ka hap ban shong jingïalang shuwa.
Ha kajuh ka por pat u la ong ba ki 8 ngut ki MLA ki dang long ki dkhot ka UDP haduh mynta, namar kim pat mih noh na ka party.
Haba la kylli kaei kaba pynmih ïa kane ka jingjia baroh, u Bah Chyne u la ong ba don bun ki daw, hynrei kam dei namar ka jingkynad halor ka jingïalam ka party. U la ong ba don kiwei pat ki daw hynrei um lah ban pynpaw paidbah ïa ki.
Haba la kylli lada ki MLA ki leh ïa kane namar ka jingmyntoi ha ka saiñpyrthei, u Chyne u la jubab ba kata ka dei ka rai shimet jong ki.
U Chyne u la pynshai ruh ba ka UDP kum ka party kam pat ïasoh ne ïatreilang bad BJP. Lada ki MLA shimet ki leit sha BJP, kata kam mut ba ka UDP baroh kawei ka leit sha BJP.
