Shillong : Ka Laitkor SC ka la lah ba kan ieh shadien ia ka sur bym lah ban ialehkai bha ka jong ka ha kane ka samoi ialehkai hynrei ha ka khyllipmat ba donkam tam ka la lah ba kan iakhun ban pynliem ia ka Sawmer SC da 2-1, haka lympung ialehkai jong ka Shillong Premier League 2026 ba la long ha SSA Stadium, hynne ka sngi.
Ha lyndet kane ka jingjop ba kordor tam ia ka Laitkor SC ka la wan lyngba ki artylli ki kol kiba la thep ia ka ha baroh ki ar kylla jong ka jingiakhun katta da u Hamingbert Nongbet (18’, 63’) bad ia ka shi kol naka bynta ka Sawmer SC la thep ia ka da u Bickyson Kharkongor (38’).
Ha ka jingshisha, lada jia ba ka Sawmer SC kan kham pyneh bha ia la ki khohwah ki jong ka kan jin da la lah ba kan da kiew syndon joit wat halor duh ka miej iakhein point, hynrei ha kaba kut kan iai neh ialade ha ka kyrdan kaba saw hadien ba ka la ioh ba kan khur 9 point, katba ka Laitkor SC lyngba kane ka jingjop kan khur 6 point, ia kaba kam pat long pat ba la biang pura ia ka ba kan lait hi war na u line saw (relegation zone), namar ba kan iai neh ha ka kyrdan ba 9.
Ka kol ba nyngkong ba ka Sawmer SC ka la ioh ba kan thep ka la wan shwa na ka bol kaba la iarap ban pynbuh iaka da u Balajiedlang Lyngwa kaba la poi hajan u Hamingbert ban ioh ban head beit kluk sha lyndet jong ka kol.
Wat la katta ruh na ka liang ka Sawmer SC ruh ka la ioh lem ia la ki kabu ksiar ki jong ka ban pynphai ia kane ka shi kol ba ka la shah tam kaba nyngkong ka wan lyngba u Michaelson Kurbah bad na u Diego Khyriem, ia aba kim shim la lah ban pynurlong.
Hadien kane, u Bickyson u la ioh ia ka kabu kaba paka naka bynta ban pynphai ia kane ka shi kol ba ka Sawmer ka la shah tam shakhmat, kaba la wan shwa na ka jingpyrshang ka jong u Mark Wanswett kaba hangne u Hukumskhem bad Bickyson ki la beh shajan ba don kane ka bol bad marsien ia hap hajan u line ka kol, u Bickyson u la lah ban khalah khatduh da la ka jong ka kjat ka jong u ban pynkhih ia ka jar.
Haba wan ban bteng ia ka kylla miet hapoh ar minit ba la sdang biang ia kane ka jingiakhun, ba ka Laitkor ka la ioh ba kan thep pat sa ia ka kol kaba ar ka jong ka lyngba u Hamingbert, kaba khyndiat ka la wanrah pat ia ka mynsiem ba kmen ia ka Laitkor ban lah ban jop uia kane ka jingiakhun, hynrei kaban dang donkam shuh shuh pat ia ka ban iakhun tyngeh ba kan lah ba kan iai neh pat ialade ha kane ka lympung ialehkai.
Ka jingiakhun ban wan kane ka lympung kan long pat haduh ka sngi nyngkong ka taiew kaban wan ha kaba ka Mylliem SC kan iakhun pyrshah ia ka Meghalaya Police ban long ha ka por 3 baje nohphai sngi.
