Shillong : Ki nongshet ja sngi hapoh ka skhim PM Poshan ha Meghalaya ki la pynlong da ka jingiakkhih naduh ka 1 tarik u Nailur, da kaba dawa ban pynkiew ïa ka jingsiew jong ki man u bnai na ka ₹2,000 sha ka ₹10,000 shi bnai.
Haba kren ha ka jingïakhih ha Khyndailad ha ka sngi Ba-ar, ka President jong ka Union of Cook cum Helper PM Poshan Meghalaya, ka Kong Gina Nengnong, ka la ong ba ki la hap ban sangeh ban shet ja ha ki skul namar la bun bnai ba ki la phah ïa ki shithi jingkyrpad hynrei kim ïoh jubab.
Ka la ong ba lyngba ka All Jaintia Midday Meal Worker, naduh u snem 2019, ki la phah ïa ki shithi sha u Myntri Rangbahduh Narendra Modi ban dawa pynkiew ïa ka jingsiew jong ki.
Ka union la seng ha u snem 2023 bad naduh kata ka por ki la phah bunsien ïa ki shithi sha u Myntri Rangbahduh, u Myntri ka tnat Pule Puthi bad u Myntri ka tnat Kam Pla Tyngka.
Ïa ka jingsiew jong ki shet ja la bei pisa ha ka rukom 90:10 hapdeng ka Sorkar Pdeng bad ka Sorkar Jylla. Ka bynta jong ka Sorkar Pdeng kaba ₹900 ka la neh kumjuh la 20 snem, katba ka Sorkar Jylla ka la pynkiew ïa ka bynta jong ka ha u snem 2022.
Ka Kong Nengnong ka la ong ba ha u snem 2022, ka bynta jong ka Jylla la pynkiew na ka ₹100 sha ka ₹1,100, bad mynta ki nongshet ja ki ïoh ₹2,000 man u bnai.
Ka la ong ba ki la rai ban pynlong da ka jingiakhih naduh ka 1 tarik haduh ka 30 tarik u Nailur namar kim shym la ïoh jubab ïa ki shithi kiba ki la phah.
Haduh ka 22 sngi jong ka strike, ka la ong ba ym pat don kano kano ka jubab na ka Sorkar Pdeng.
Ka Kong Nengnong ka la kyrpad ïa u Myntri Rangbahduh ban pynkiew ïa ka jingsiew jong ki, namar ka ₹900 na ka Sorkar Pdeng ka la neh kumjuh la 20 snem, katba ki dor jong ki marbam ki la kiew.
Ka la ong ba ki dawa ban pynkiew ïa ka bynta jong ka Sorkar Pdeng sha ka ₹9,000 man u bnai.
Ka la maham ruh ba lada ka skhim PM Poshan ka sangeh, kan ktah ïa ki khynnah bad ki longïing kiba duk, namar kane ka skhim ka la ïarap ïa bun ngut ki khynnah.
“Ngi kyrpad ïa u Myntri Rangbahduh ban jubab kloi ïa ka jingdawa jong ngi,” ka la ong.
