Shillong, Nailar : Ka Sawmer Sports Club ka la lah ba kan pynliem ia ka Rangdajied United FC da 2-1, ha ka lympung ialehkai Shillong Premier League 2026, ka Shillong Sports Association, ba la long hynne ka nohphai sngi ha SSA Stadium, Polo.
Ki jingkylla kaba kine ki ar kynhun ki la wanrah ha kane ka jingiakhun ka ka long ha ka dur ka jingpynmih ia ki player, ha kaba ka Sawmer SC u Andy Z Mawthoh u la wan ban mih bujli noh ha ka jaka ka jong u Bickyson Kharkongor, katba ka Rangdajied United FC ka sei bujli da arngut ki player katta u Ronald Kharkongor bad Khainkupar Iawphniaw kiba mih bujli noh ha ka jaka ka jong u Mebannangkiew Thabah bad Mebatskhem L Lyngkhoi.
Marsien ia sdang ki la don ki kato katne ki jingpyrshang ban nion shakhmat na ka kynhun ka Rangdajied United FC ha kaba u Balamlynti Khongjee u la pyrshang ban shut jam bha ia ka bol sha u rang ap kol ka Sawmer Pyrshangbanbha Dkhar bad kumjuh wat na ka liang ka Sawmer u Banteilang Lyngdoh u la pyrshang lem ban ioh pynkhih ia ka jar ia kaba la lah ban kyrda noh ia ka da u rang ap kol ka Rangdajied u Meshan Banjop Sumer.
Ka kol kaba nyngkong ka jingiakhun ka la wan lyngba ka Sawmer SC kaba la ioh ba kan thep ia ka lyngba u Oresterwell Langshiang (18’) ia kaba ym slem hadien jong kane, ka Rangdajied United FC ka la ioh ia ka kabu ba kan pynphai kylla noh ia kane ka shi kol lyngba u Pasborlang Khonglikong ha ka minit kaba 24, katba ia ka kol kaba ar naka bynta ka Sawmer SC la thep pat ia ka da u Wanshanlang Dkhar (36’).
Hadien ka jingshah tam noh shakhmat, ha ka kylla miet ka Rangdajied ki la pyrshang ban wanphai biang sha ka jingiakhun, kaba ha shwa kaba kut nioh artad, ki la sdang ban pynkylla wat ia ka buit ialehkai ka jong ki, da kaba ki iai pyrshang ban ther beit ia ka bol sha kadiang bad kamon ka madan ba don ki player ki jong ka ban ia kaba ki ialeh ban kyntur shakhmat da kaba sdang shwa kham na shadien,.
Hynrei ka buit ialehkai ka jong ki, kam shim la don jingktah satia ia ka kynhun ialehkai ka Sawmer SC, kiba la ieng iada bha ia ka jong ka kut ialehkai ka jong ki katno tam lei lei ban lah ban iai tam shakhmat da ki ar kol ba ki la dep ba kin ioh ban thep
Ia ka por pynjlan ia kane ka jingiakhun shwa ba kan kut ka long long jan haduh phra minit, kaba hangne hi ka jingiakhun hapdeng kine ki ar kynhun ka long beit ba ka Rangdajied ki la ksaid tyngeh ban pynkhih ia ka jar, katba ka Sawmer ka la shu ieng iada beit ia la ka kut ialehkai ka jong ka, kaba ha kaba kut, ka Sawmer SC jrut kan hun ka mynsiem ban lah ba kan khur ia ka jingjop bad khatam eh ia ka lai point kaba kordor tam eh ka jong ka na kane ka jingiakhun.
Lashai pat ka sngi, ka jingiakhun kan long hapdeng ka Mylliem SC pyrshah ia ka Laitkor SC, kaban long ha ka por 4 baje nohphai sngi.
Kine ki ar kynhun ki rung sha kane ka jingiakhun hadien ba ka Mylliem SC ka la shu shah liem salit da 1-0 hakhmat ka Nongkseh SSCC katba na ka liang ka Laitkor SC pat kan mad ia ka namrem kaba long da 5-0 hakhmat ka Mawlai SC.
Kumta kane ka jingiakhun kine ki ar kynhun lashai ka sngi la khmih lynti ba kan iakhaid bad biang bor bha, namar baroh ar kin donkam ban khur ia ki nam jop kum shi bynta ban iai don ha ka thong ban lah ban jam shakhmat ha kane ka samoi ialehkai ba mynta ka SPL.
