Shillong, Nailur 10 : Ki nongri sniang na kylleng ki la shim bynta ha ka jingiaid rally da kaba rah lang bad ki sniang naduh jan Civil Hospital shaduh madan Malki ha ka sngi Palei ban dawa na ka sorkar ba kan mad noh ia ka ram ri sniang hadien ba ki paidbah ki la mad ia ka khlam ba shyrkhei na ka jingwan ka khlam African Swine Fever (ASF).
Ia kane ka rally la pynlong da ka Hill Farmers Union, da ka thong ban pynpaw ïa ka jingeh jong palat 1,200 tylli ki longïing kiba la shah ktah ha kylleng ka jylla.
U General Secretary jong ka Union, u Alfonbirth Kharsyntiew, u la ong ba ki jingkyrpad ba la ju phah bunsien ban ïakynduh ïa u Myntri Rangbah ka jylla kumjuh ia u Myntri ka tnad Animal Husbandry tangba kim shym la ioh ia ka jubab kaba hun.
“Kane ka la pynbor ïa ngi ban mih sha surok khnang ban pynsngew. Ngi la ïoh jingbit na u Deputy Commissioner bad na ki pulit ban pynlong ïa ka jingïalang kaba jai jai,” u la ong.
U la ong ba ki nongïoh jingmyntoi na ka Piggery Mission kiba la ïoh ram khlem sut mynta kim lah shuh ban siew ïa ki ram hadien ba ki la duh lut ïa ki sniang namar ka ASF.
U Bah Kharsyntiew u la kynnoh ïa ka sorkar ba kam shym la pyntreikam ïa ka SOP jong ka hi kaba la pynmih ha ka 10 tarik Nailar, 2023, kaba dawa ïa ka jingtest ia ki sniang lyngba ki checkpost ba la buh kyrpang bad ka jingbuh quarantine ne set kut ïa ki sniang kiba wan na shabar ka jylla.
“Ym don satia kum kine ki checkpost ha Ri-Bhoi. Kane ka jingbym pyntreikam ka la ailad ïa ka khlam ASF ban saphriang,” u la kynnoh.
Ka union ka la dawa ban buh ïa ki checkpost kiba don ruh ki jaka set kut, ban pyllait ïa ki nongïoh jingmyntoi na ka Piggery Mission na ka jingpynphai ïa ki ram, bad ban ai jingïarap pisa ïa ki nongrep shimet kiba la shim ram na ka bynta ka ri sniang.
“Ka memorandum kaba nyngkong eh jong ngi sha u Chief Minister ha u snem 2018 ka la dawa ïa ka agriculture policy hynrei mynta la phra snem hynrei ym pat don kano kano ka jingiaid jong ka kam,” u la ong.
