Shillong : Ki Pulit ka Jylla ki la pynkhreh shaid shaid na ka bynta ban pynkhlain ia ki bor pahara bad kumjuh halor ka rukom pyniaid kali na ka bynta ka jingwan jong u Myntri Kampohiing ka Jylla u Amit Shah uban wan sha Shillong ha ka 04 bad 05tarik mynta u bnai ban shim bynta ha ka jingïalang ban pynkup burom da ka khusnam President’s Colour ïa ka Meghalaya Police
“Ka jingpynkhreh ka la iaid shaid shaid mynta na ka bynta ka jingwan jong u Myntri Kampohiing ka Ri kaba la buh ha ka 04 bad 05 tarik mynta u bnai. Ia ki jingpyntip yn sa bthah da u SP Traffic haba iadei bad kino ki lynti kiba hap hap ban kiar ban iaid ha kito ki sngi khnang ba kan ym don eh ka jingktah kaba jur ia ki paidbah,” ong u SP ka East Khasi Hills, Bah Vivek Syiem haba kren bad ki lad pathai khubor hakane ka sngi Palei.
U la ong ba ka jingpynbeit ïa ka leit ka wan ki kali ka long ka mat kaba khraw tam kaba donkam ban peit bniah.
“Ka la don ka jingpynkhreh bha ban pynbeit ïa ka leit ka wan ki kali, namar kata ka long ka jingeh kaba khraw tam ha kaba ïadei bad ka leit ka wan ki kali bad ka jingïaid jong ki kali kit mar. Kumta, yn pynbeit ïa kane da ka jingpeit bniah,” la bynrap shuh shuh u SP.
Haba kren halor ka jingpynbeit ïa ki pulit ban pahara, u la ong, “Ka jingpynkhreh ïa ka rukom pahara ka la long kaba bniah ha baroh ki lynti, nangta ki kynhun pulit ba kyrpang bad ki unit bapher bapher ki la wan bad kan kot kumba 1500 ngut ki pulit hangne, bad baroh ki jingpynkhreh ki la dep.”
U Myntri ka Sorkar Pdeng ba dei khmih ïa ka tnat Kam Pohïing un sa aiti ïa ka khusnam burom kaba kyrpang jong ka Presidential Colours sha ki pulit ka Meghalaya, kaba long kawei na ki kynhun pulit ha ka thaiñ Shatei Lam Mihngi kiba la ïoh ïa kane ka jingithuh.
“U Myntri ka Sorkar Pdeng ba dei khmih ïa ka tnat Kam Pohïing u wan sha kane ka prokram kaba khraw ban pynkupburom da ka Presidential Colours. Kane ka long ka mat kaba pynsngew sarong ïa ki pulit ka Meghalaya bad ka long ruh ka jingjop kaba khraw. Ngi long napdeng ki katto katne ki jylla ha ka thaiñ Shatei Lam Mihngi kiba la ïoh ïa kane ka jingithuh,” la bynrap shuh shuh u SP.
“Kane ka long namar ka jingaiti lut bad ka jingtrei shitom jong ngi ha ka jingshakri. Ngin iai pyrshang ban ai ïa kaba bha tam ha kano kano ka kam kaba ngi leh na ka bynta ki paidbah bad ban pynthikna ba ka jingshakri jong ki pulit kan poi sha ka kyrdan kaba ha khlieh duh ha ka jingtbit, ka rukom ai jingshakri kaba paka bad ka jingtrei hok,” u la bynrap.
