Shillong, Nailar 05 : Ka thup kyrteng thep vote ka Jylla kaba la pynmih hadien ka jingpeit bniah lyngba ka Special Intensive Revision (SIR) ka pyni ba ki don palat 21 lak ngut ki nongthep vote kiba paw kyrteng katba kumba 1.8 lak ngut ki khlem paw kyrteng shuh hapoh ka thup kyrteng thep vote (draft electoral roll).
Katkum ka thup kyrteng thep vote kaba la pyllait paidbah da u Chief Electoral Officer ka Jylla, u BDR Tiwari ha ka 5 tarik u Nailar, 2026, ka pyni ba ka Jylla Meghalaya ka don 21,69,243 ngut ki nongthep vote ha baroh 60 tylli ki konstitwensi.
Hynrei kane ka pyni ba ka jingdon ki nongthep vote ha Jylla ka la nang hiar namar baroh shikatta, ka Jylla ka don haduh 23 lak, 49 hajar, 645 ngut ki nongthep vote hashwa ban peit bniah ïa ki kyrteng jong ki nongthep vote lyngba ka SIR.
Na kine ki 21 lak, 69 hajar, 243 ngut ki nongthep vote, 10 lak, 53 hajar, 039 ngut ki dei ki shynrang, bad 11 lak,16 hajar, 199 ngut ki dei ki kynthei, katba 5 ngut ki dei ki third gender.
La pyni ruh ba ki don haduh 1 lak, 80 hajar, 402 ngut ki nongthep vote kiba khlem paw kyrteng shuh ha ka thup kyrteng hadien ba la dep ban khmih bniah ïa ki kyrteng kynthup ka jingleit sha ki thliew ïing ban pyntikna ïa ka kyrteng jong kito kiba la don lypa ka kyrteng ha ka thup kyrteng (electoral roll).
Kine ki 1 lak, 80 hajar, 402 ngut ki nongthep vote ki bym paw kyrteng kj kynthup ïa kito kiba la khlad, kiba la kynriah noh shawei pat, nangta kiba pep ban pyndap kyrteng thymmai nalor kito kiba paw kyrteng kumjuh ha kiwei pat ki jaka.
Nalor kine, ki dkn ruh sa 2 lak, 22 hajar, 786 ngut ki kyrteng jong ki nongthep vote kiba khlem lah ban pynïasoh lang bad ka SIR, 2005. Kumta ïa kine la buh ha ka thup “No Mapping” ha kaba ki donkam ban dang hap pynshisha thik pa thik hashwa ban pynrung kyrteng biang ïa ki hapoh ka thup kyrteng thep vote.
Ïa ka thup kyrteng thep vote kaba pura yn sa pyllait paidbah ha ka 7 tarik u Risaw, 2026.
