HA KA TIE BREAKER PYNLIEM KA MLP FT IA KA LANGSNING FC BAN RUNG SHA KA S/F KA SUPER CUP

Shillong: Ka Meghalaya Police Football Team (MLP FT), ka la sei ia ka khubor kaba pynkyndit ia u paidbah ba ieit bad ba sngewtynnad ia ka phutbol, bad kane ka la wan hadien ba ka la lah ba kan pynliem ia ka Langsning FC lyngba ka tie breaker kaba long da 5-4, ha ka jingiakhun ia ka Playoff kaba ar jong ka lympung ialehkai SSA Super Cup, ba la long hynne ka ka sngi ha SSA Stadium, Polo.
Ka khana jong kane ka jingiakhun ka long ba dei ka Langsning FC kaba la ioh ba kan pynkhih nyngkong ia ka jar ha ka kylla step, kaba la wan lyngba u Wadajied Kynsai Ryngkhlem ha ka minit ba 17, ia kaba na ka liang ka MLP FT pat ka la lah ban pynphai kylla pat ia ka ha ka kylla miet lyngba u Rapborlang Marwein ha ka minit ba 67.
Kaba hadien kane, haduh ba kut ka 90 minit bad ka 30 minit ba la pynjlan (extra time), ka jingiakhun hapdeng kine ki ar kynhun ka la iai neh sah ha ka jingiakhaid kaba long da mar shi kol, ba khlem don shuh mano mano ba lah ban ioh pynkhih ia ka jar.
Haba la rah sha ka tie breaker ha ki lai sien shut kiba sdang, ki ar kynhun ki la lah ban ioh pynkhih ia ka jar.
Hadien kane u Chesterfield Nongdhar ka MLP FT ha ka jingwan shut ka jong u dain ka bol ka la dei beit ia ka ding kol, katba ka tie breaker ba la shut da u Donlad Diengdoh hakaba ka bol suit ka her beit shalor. Hadien kane, ka MLP FT ka la lah ba kan pynkhih pat arsien ia ka jar, katba ka Langsning RFC ka la lah satang kawei, bad ha ka sien shut ba hynriew, u Mangkara Sun ka Langsning FC u la tur shakhmat, kaba hangne marsien ia shut u Eveningstar Bareh rang ap kol ka MLP FT u la lah ban kyrda ia ka, kaba marsien ia jia kumne, puk mih ka sur ia kynhoi ia risa na ki nongkyrshan ka MLP FT, hynrei naka bynta ka kynhun ialehkai ka Langsning FC, ka long kumba la theh beit da ka umpjah naduh khlieh haduh kjat.
Da kumta, ka Super Cup mynta ka samoi, lah ban ong ba ka la sei shisha ia ki artylli ki jingiakhun kiba itynnad bad biang bor bha jong baroh artylli ki playoff, namar ba hynnin ka sngi, ka Nongkseh SSCC ka la hap ba kan da ksaid tyngeh ban lah ban pynliem ia ka sawmer da 4-2.
Kumta da kane ka jingjop, kaba sah mynta ia ka MLP FT ba kan phai khmat naka bynta ba kan khreh ba kan iakhun pyrshah ia ka Shillong Lajong FC kaba dei artad ka semifinal kaba ar kaban long la sngi Saitjain.