Shillong: Ka jingiakob jngi ba ar sngi ba la tip ia ka kum ka 1st Open Swimming Competition bad Masters Meet ba la pynlong da ka True North Leisure Centre ka la poi noh sha kaba kut hynnin ka sngi Saitjain, ha ka pung jngi kaba don ha Lapalang.
Ha kane ka jingiakob kaba ar sngi, ka pung hi ka la dap bad shlei da ki nongwan shim bynta ba kynthup naduh kiba dang rit, ki khynnah, ki samla ne wat haduh kiba la san la rangbah, kaba pynlong ia ka jingiakob kaba da shongkun kaba ai mynsiem bad kaba don ruh kata ka jingkyrmen ia ka lawei jong ka ialehkai jngi hangne hapoh ka jylla.
U kongsan ba la wan ban iadon lang bad ban sam ia ki khusnam ba shimet u long u MP Rajya Sabha ka jylla u James PK Sangma, uba la pyllait ia ka por ka jong u ban khmih ia ki kato katne ki jingiakhun phainal.
Shuh shuh ha I por ba dang shongthait ia ka jingiakob, la wan mih pat uwei u khynnah, u bym don shuh ki kti ne kjat bad uba don hapdeng ka jingsumar sukher kaba paka ha PMR Laban, u Iarapborlang Chyne, ba shong bas ah ha Nongmensong (Lumphira), ia kaba la btin lynti ia u ba un long kum u para sprinter, bad ba dang shen la pynkhreh ruh ia u ba un pyrshang sa ban jngi ha kaba u la leit ban shah hikai kumba hynniew sien ha Trur North.
Marsein wan shajan ka pung jngi, ki nongialehkai bad ki paidbah nongwan peitkai joit ki la ieng na ka jaka ba ki shong, kum shi bynta ban ai mynsiem ia u, ha kaba u la pyndep ban jngi 25 meter ha ka backstroke, kaba hangne katba u dang jngi la shu sawa beit ki sur ka jingthap kti ba jam bha.
Ha kaba kut jong ka jingiakob baroh nalor ki takma ba la sam sha ki nongjop, la sam ruh ia ki khusna nong jngi ba kynsai (best swimmer), ba long kumne harum:
Best Swimmer
Category 1 – Theodore J Ch Marak (male), Hanania E Kharkongor (female)
Category 2 – Issac FC Kharsati & Asher W Lyngdoh (male), Naphisa D Ksoo (female)
Category 3 – Ezra A Khonglam (male), Ira N Wahlang (female)
Category 4 – Meiaipynsan Lyngdoh Tron (male), Verem G Nongsiej (female)
Category 5 – Elhanan J Kharwar (male), Tvisha Jalewa (female)
Category 6 – Shaun M Diengdoh (male)
Senior – Banpynshngain Syngwan (male)
Best Swimmer (Masters):
Category A – William Sangma (male), Glarcenda Z Wahlang (female)
Category B – Rimiki Lyngdoh (male), Mebashisha L Lyngdoh (female)
Category C – Ardonister Lyngdoh (male), Gracia M Diengdoh (female)
Category D – Robert Lyngdoh (male)
Category E – Mario Hek (male), Merry S Syiem (female)
Category F – Keith R Syiemlieh (male)
