Naitung 23: U nongïalam ka National People’s Party (NPP) uba long ruh u Symbud Myntri Rangbah (Dy CM) ka Jylla, u Bah Sniawbhalang Dhar, u la ïakynduh ïa ki nongïalam bad ki dkhot jong ka Niamtre Raid Nongjngi ban pan jingkyrshan na ka bynta u Dr. DRL Nonglait, uba long u kyrtong ha ka ilekshon MP shiteng samoi ka ban sa pynlong shen.
Kane ka jingïakynduh ka dei shibynta na ka jingïalap ilekshon na ka bynta u Dr Nonglait.
Haba ai jingkren, u Bah Dhar u la ban jur ba kane ka ilekshon ka dei ka kabu ban pynkhlaiñ ïa ka jingïatylli, ka shongsuk bad ka roi ka kiew jong ka Meghalaya. U la kyntu ïa ki paidbah ban ïeng lang khlem da don ka jingpynïapher bad ban jied ïa u nongïalam uba lah ban pynsngew ïa ka sur jong ka jylla sha Parliament.
U la ong ba ka Meghalaya ka don bha ka lad ban kiew kham shalor bad ka donkam ïa ka jingïatylli hapdeng ki paidbah, ki shnong ki thaw, ki jaitbynriew bad ki niam bapher bapher.
“Haba ngi ïeng lang kum kawei ka jylla, ym don kano kano ka jingeh kaba ngim lah ban jop. Ka jingïatylli ka long u maw nongrim jong ka roi ka kiew bad ka jingshngaiñ jong ki paidbah,” la ong u Bah Dhar.
U Symbud Myntri Rangbah u la ai khublei ïa ka Niamtre Raid Nongjngi bad u kular ban trei da ka jingkitkhlieh na ka bynta ka jingmyntoi jong ki paidbah, ka bha ka miat jong ka jylla bad ka lawei kaba kham phyrnai jong ka Meghalaya.
