Shillong, Nailur 15 : Ka Shillong ka la pdiang sngewbha palat ia ka 250 ngut ki nongialehkai badminton na kylleng ka thain na ka bynta ka Yonex Sunrise North East Interstate Badminton Championship 2026, kaban sdang ha ka sngi Balang.
Ia kane ka jingiakob ialehkai badminton la pyniaid da ka Meghalaya State Badminton Association ba la kyrshan da Directorate of Sports and Youth Affairs jong ka sorkar Meghalaya hapoh ka jingkhmih jong ka Badminton Federation of India bad kane ka jingialehkai kaba saw sngi kan long ha JN Sports Complex Indoor Stadium.
Ia kane ka championship la pyniaid da kaba pyntyllun na kawei ka jylla sha kawei pat napdeng ki phra tylli ki jylla ha ka Thain Shatei Lammihngi. Ka sien kaba khatduh ba ka Meghalaya ka la ioh ban pynlong ka dei ha u snem 2016, hadien ba ar snem ki khlem ioh ban pynlong na kadaw ka khlam Covid-19.
Ka jingwanphai biang jong kane ka jingiakob kaba heh ha ka thain ka la pynkmen bha ia ki nongialehkai badminton ka thain, kiban ioh ia ka kabu ba kin tynjuh ia lade pyrshah ia ki player donsap ka Thain Shatei Lammihngi.
Kawei ka jylla, kynthup ia ka Meghalaya kaba pyniaid, ki lah ban phah ym duna iaka 34 ngut ki nongialehkai badminton bad kan don ka jingiakhun ha ka kyrdan U-17, U-19, senior ba para marwei bad kumjuh ka team championships, pyntip u MSBA Vice-President u bah Pynbianglang Laloo.
Ki jingialehkai kin sdang haka sngi Balang ka 16 tarik u Nailur ha ka por 8 baje mynstep.
Uwei na kiba ia shim bynta u dei u H Lalthazuala of Mizoram, uba dei u national U-17 champion bad u ba la mih khmat ia ka India ha ka Badminton Asia Junior Championships ha Indonesia bad ha ka World Junior Badminton Championships ha Guwahati, baroh ar ki jingiakhun ki la long mynshem snem.
Ha kane ka jingwan jong u ha ka sien kaba nyngkong ha nongbah Shillong, u Lalthazuala u kyrmen ba un lah ban ialehkai bha. “Ym ban khyllew, hynrei nga sngew ba ngi don ia ka kynhun kaba khlain,” u la ong na ka bynta ka kynhun jong u ka Mizoram.
