SHILLONG : Ki nonghikai SSA ha Meghalaya ki la pynpaw ka jingpyrshah jur ia ka jingdawa jong ka Voice of the People Party (VPP) ban weng noh ia u Commissioner & Secretary ka tnat Pule-Puthi, u Vijay Kumar Mantri.
U President ka MSSASA, Aristotle C Rymbai, ha ka Sngi Saitjaiñ u la ong ba ka jingkren jong u nongialam ka VPP, u Ardent Basaiawmoit, ka long kaba pynkyndit bad kaba khlem shongnia
“Ngim shym poi pyrkhat ba yn don kum kane ka jingkren na u Bah Ardent Miller Basaiawmoit uba dei u nongmihkhmat ba la jied da ki paidbah bad uba ngi burom,” la ong u Rymbai.
“Ha ka bynta jong ngi kum ki ba ia dei kam, ngi shem ba u Sir Vijay Kumar Mantri u dei u briew uba trei shitom bha, uba aiti lut bad uba kut jingmut ban wanrah ia ki jingkylla ha ka liang ka pule-puthi ha Meghalaya,” u la ong.
U Rymbai u la ong ruh ba u Mantri u long uba lah ban poi sha ki nonghikai bad uba sngap ia ki jingeh jong ki.
“U dei u briew uba kloi bad uba sngap bad shimkhia ia ki jingeh kiba la pynpaw da ka kynhun ki nonghikai. Namarkata, kum ka association, ngi sngew ba ka jingdawa jong ka Voice of the People Party ban weng noh ia u Sir Vijay Kumar Mantri ka long kaba khlem nongrik, namar u dei tang uwei na ki ophisar kiba pyntreikam ia ki policy ne ki rai kiba la shim da ka sorkar hadien ba la bud ia ka rukom treikam kaba dei,” u la ong.
Ha kaba kyrshan ia ka jingpynbeit thymmai jong ka sorkar, u Rymbai u la ong ba ki nonghikai SSA, adhoc bad fourth teachers ki la mad ia ka jingeh la bun phew snem namar ka jingbym don ka jingshngaiñ ha ki kam.
“Lah ban ong la kumba ar haduh lai phew snem, ngi ki nonghikai SSA, adhoc bad fourth teachers, ngi ioh ia ka tulop ha ka rukom fixed pay khlem kano kano ka jingshngaiñ ha ki kam. Kane ka sorkar hapoh ka jingialam jong u Myntri Rangbah Conrad K Sangma, u Myntri ka Pule-Puthi Lahkmen Rymbui, u Commissioner & Secretary Vijay Kumar Mantri bad kiwei ki ophisar rangbah ka tnat Pule-Puthi, ha ka jingïakren bad ki stakeholder, ka la wanrah ia ka policy ban pyntreikam ia ka Structured Pay Framework, kaba pynthikna ba ka tulop kan long katkum ka rukom ba la buh bad katkum ka jingshakri, bad kumjuh ruh ban pynthikna ba ki kam jong ngi kin long kiba la iada da ka sorkar,” u la ong.
“Ym tang kata, ka sorkar ka la wanrah ruh ia ka policy ban pyniar ia ka CPF sha kine ki nonghikai,” u la bynrap.
Da kaba pdiang ba ka SPF ka dang donkam ia ka jingpynbha, u Rymbai u la ong ba dei ban pynbeit ia ka lyngba ka jingïakren bad ym da kaba pynbeit ia ka jingthmu ban pynrem ia ki briew da ki jingïaleh saiñ pyrthei.
“Hooid ka Structured Pay Framework ka dang donkam ia ka jingpynbha ha ka por ban wan, bad kane lah ban leh lyngba ka jingïakren, jingïasyllok bad ka jingkitkhlieh lang jong baroh ki stakeholder bad ka sorkar,” u la ong.
“Watla ngi dei ki nonghikai SSA, deficit teachers, adhoc teachers, fourth teachers ne ki nonghikai sorkar, ha kaba kut ka sngi baroh ngi trei ia kajuh ka kam bad ngi trei ha kajuh ki por trei, namarkata baroh ngi dei ban ioh ia kajuh ki jingmyntoi ha ka liang ka tulop bad kiwei ki kyndon jong ka jingshakri,” u la ong.
“Na ka bynta jong ngi, ka association ka sngew ba ka sorkar ka dei ban wanrah ia ka policy kaba long kajuh na ka bynta baroh, khamtam ha kaba iadei bad ka kam hikai,” la bynrap u Rymbai.
