SHILLONG : U Myntri Rangbah ka Meghalaya bad National President ka NPP, u Conrad K Sangma, u la pdiang ba ka seng ka “sngewsih bha” hadien ba ka bor jong ka NPP ha Nagaland ka la hiar sha kaba ym don shuh ki MLA, hadien ba ki MLA jong ka seng ki la pynïasoh lang sha kawei pat ka kynhun.
Tangba, u la ong ba ka NPP kan wanphai biang da ka bor kaba kham khlaiñ ha Nagaland bad ha baroh ka thaiñ Shatei Lam Mihngi.
U Sangma u la ong ba kane ka dei ka bynta jong ka saiñpyrthei bad ki seng saiñpyrthei ki ju mad ïa kum kine ki jingjia ha ki bynta bapher bapher jong ka ri bad ha ka thaiñ NE. U la pdiang ruh ba ka NPP kam sngewtynnad satia ban iohi halor kane ka jingjia.
“Ngi sngewsih bha halor kane, hynrei ngi pdiang ba ha ka saiñpyrthei ngi hap ban ïakynduh ïa kum kine ki jinglong jingman,” u la ong.
U la pynkynmaw ba ki jingjia kum kine ki la ju jia mynshuwa ruh ha Arunachal Pradesh bad Nagaland.
Haba phah ïa ka khubor sha ki nongtrei bad nongkyrshan ka seng, u President ka NPP u la ong ba ki por kiba eh ki dei ban pynkhlaiñ shuh shuh ïa ka jingaiti lut jong ki sha ka seng.
U la kyntu ïa ki nongtrei, nongïalam bad nongkyrshan ka NPP ban ïatylli bad ïatreilang wat hapdeng kine ki jingeh, bad ban pynskhem shuh shuh ïa ka jingngeit jong ki ha ka seng bad ki nongrim kiba ki la tei.
U Sangma u la ong ruh ba kane ka jingeh ka dei ban pynlong ïa ka NPP ban wanphai kham khlaiñ, ym ban shah pynpra. U la pynskhem ba ka NPP kan ïaid shakhmat bad kan wanphai biang, ym tang ha Nagaland hynrei ha baroh ka thaiñ Shatei Lam Mihngi.
Haba kren halor ka jingïadei jong ka NPP bad ka NDA, u Sangma u la pynshai ba ka NPP ka dang dei bynta jong ka NDA bad ka dang bteng ban kyrshan ïa ki sorkar NDA ha ki jylla bapher bapher jong ka thaiñ.
U la ai nuksa ïa ka Meghalaya, ha kaba ka NPP, watla ka dei bynta jong ka NDA, ka la ai bynta ïa ki paralok ba ïatreilang ha ka Cabinet. Ha Nagaland, pat, kam shym la long kumta watla ka NPP ka la ai jingïarap bad jingïatreilang ïa ka sorkar.
U la ong ruh ba ha Arunachal Pradesh, ka NPP ka la ai jingïatreilang ïa ka sorkar hynrei kam shym la ïoh bynta ha ka rukom pynïaid ïa ka sorkar. Ha Manipur, pat, ha ka jingïasmai kaba dang shen, ka NPP ka la ïoh ïa kawei ka shuki Myntri na ki san ngut.
U Sangma u la pynshai ba ka jinglong jingman ka pher ha kawei pa kawei ka jylla. Watla ka NPP ka lah ban ym ïoh bynta kum ka coalition ha ka liang ki kam Myntri, hynrei ha baroh saw tylli ki jylla ha kaba ka seng ka don, ka NPP ka la pynpaw ïa ka jingkyrshan ïa ki sorkar NDA, la ka sorkar ka long hapoh kano kano ka seng kaba ïalam.
