SHILLONG: U Myntri Rangbah ka Jylla bad National President ka NPP, Conrad K Sangma, u la kyntait ïa ki khubor ba bun ngut ki MLA ka NPP ki thmu ban pynïasoh sha ka BJP, da kaba pynskhem ba ka sorkar MDA-II hapoh ka jingïalam jong u ka dang skhem.
U Sangma u la ong ba kine ki khubor ki long khlem nongrim bad tang ki jingmutdur jong katto katne ki briew.
“Kine ki long tang ki jingmutdur bad ki jingtharai jong ki katto katne halor kane ka bynta,” u la ong.
U la bynrap, “Kine ki long tang ki jingmutdur kiba ki briew ki la pyrkhat bad ki la pynmih ki jingmut bapher bapher, da kaba ki pyrshang ban mutdur ïa ki jinglong jingman bapher bapher. Nga kwah ban pynkut noh ïa kane da kaba ong ba kine ki long tang ki jingmutdur.”
U Myntri Rangbah u la ong ba katto katne ki bynta bad ki lad pathai khubor ki la pynmih ïa kine ki jingpynkulmar jingmut.
U la pynshisha ïa ki MLA, ki seng kiba ïatreilang bad paidbah ba ym don satia kano kano ka jingthmu kumba la ïathuh bad ym don daw ban khuslai halor kane.
U Sangma u la pynskhem ruh ba ka sorkar MDA-II kaba ïalam da ka NPP ka dang skhem bha.
“Hooid, ka sorkar MDA-II ka long kaba skhem bha. Ka NPP marwei ka don 33 ngut ki MLA kiba dang ïatylli pura, bad ngi dang don ruh ïa ki paralok kiba ïatreilang,” u la ong.
U la ong ba watla ka jingïapher ha ka jingdon ki MLA hapdeng ki seng kiba ïatreilang ka lah ban kylla, hynrei ka bor jong ka MDA baroh kawei ka dang neh kumjuh.
“Ka jinglong jong ka jingïatreilang ka lah ban kylla hapdeng ki paralok, hynrei ka bor jong ka MDA ka dang neh kumjuh. Ka jingaiti bad jingïatreilang jong ki seng bapher bapher ruh ka dang neh kumjuh,” u la ong.
U la bynrap ba ki jingïakynduh kiba mih hapdeng ar tylli ki seng kiba ïatreilang ki dei ki mat kiba ïadei bad ki kam hapoh kine ki seng hi, hynrei kim shym la ktah satia ïa ka jingïadei jong ka coalition lane ïa ka jingskhem jong ka sorkar MDA-II.
