SHILLONG : Ha ka por ba ka kyrdan jong ka NEHU ha ka ri ka la hiar na ka kyrdan ba 15 sha ka kyrdan 151–200, ki seng samla pule ki la phah da ka dorkhas sha u Lat ka jylla Meghalaya, u CH Vijayashankar, ban dawa ïa u Vice Chancellor (VC) ba pura uba tip bha ïa ka NEHU.
Ha ka dorkhas ba ki phah lang, ka NEHUSU bad ka KSU-NEHU Unit ki la ong ba ïa ka NEHU la seng hapoh ka 1973 Act, bad la thmu kyrpang ban shakri ïa ka thaiñ Shatei Lam Mihngi jong ka ri India. Ki la ong ba kane ka skulbah ka don ïa ka nam bad ki briew kiba tbit ban kyntiew biang ïa ka, hynrei ka donkam ïa ka jingïalam kaba skhem bad kaba shim ïa ka jingkitkhlieh.
Ki seng ki la pynkynmaw ruh ïa ka jingïakhih shah thngan ba khlem sangeh jong ki samla pule ha u bnai Naiwieng 2024, kaba la mih na ki jingeh ha ka rukom treikam jong ka bor pynïaid, ki jingthung kam bad ki jingdonkam ba kongsan jong ki samla pule.
Ki la ong ba ki jingeh kiba ju mih man ka por ha ka rukom synshar, ki jingtei bad ka jingduna briew hapoh ka jingïalam jong ki VC bapher bapher ki la ktah ïa ka skulbah.
Ki la kdew ruh ïa ka kyrdan NIRF jong ka NEHU, kaba la hiar na ka kyrdan ba 15 ha u snem 2016 sha ka kyrdan 151–200 ha u snem 2025. Ki la ong ba kane ka long ka jingkylla kaba khraw bad dei ban pyrkhat sani bha shaphang jong ka.
Ki seng samla pule ki la maham ruh ba ïa ki jingpynkylla thymmai hapoh ka National Education Policy (NEP), kum ka FYUP, ITEP bad ka postgraduate course kaba shisnem, la pynïaid shakhmat khlem ki kamra klas, ki nonghikai bad ki jingdonkam kiba biang.
Ki la ong ba ka NEHU mynta ka donkam ïa u VC uba don ka kyrdan jingtip ba ha khlieh duh ha ka pule puthi, uba don ka jingshemphang ha ka pynïaid kam, uba don ka jinglong hok, ka jingiohi jngai bad ka jingaiti lut ban pynkhlaiñ ïa ka skulbah. U dei ruh ban tip bha ïa ka NEHU bad ïa ka jinglong jong ka thaiñ Shatei Lam Mihngi.
Ki seng ki la ong ba ka jingthung ïa u VC bathymmai ka dei ban long ka jingsdang jong ka lynnong kaba thymmai, kaba pynleit jingmut ha ka jingbha ha ka pule puthi, ka bha ka miat jong ki samla pule bad ka jingsngew jong ki paidbah ka thaiñ.
Ki la pynpaw ïa ka jingangnud jong ki ba ka NEHU kan long ka skulbah ha kaba ka jingïakren bad jingïasngewthuh jingmut kan long shwa ban donkam ïa ka jingïakhih
