SHILLONG : U MLA ka UDP bad Myntri barim ka tnat Tourism, Bah Paul Lyngdoh, ha ka Sngi Palei u la buh jingkylli halor ka por ba ka Joint Action Committee (JAC) ka pynpaw ïa ka jingpyrshah ïa ka projek Shillong Ropeway, haba baroh ki jingbit kiba ïadei bad ka mariang la pan bad ïoh naduh u snem 2022.
Haba jubab halor ka jingpyrshah kaba jur jong ka JAC ïa kane ka projek, u Bah Lyngdoh u la ong ba ki paidbah ki dei ban pule bad bishar bniah shwa ïa ki kot ki sla kiba ïadei bad kane ka projek.
U la ong, “Nga kwah ba phin pule bad bishar bniah shwa ïa ki kot ki sla kiba ïadei bad kane ka kam. Baroh ki jingbit kiba ïadei bad ka mariang la pan bad ïoh naduh u snem 2022, ha ka por ba nga dang long u dkhot jong ka District Council. Hadien kata, la ïoh ruh ïa ki jingbit na ka Ministry of Environment, Forest and Climate Change (MoEF).”
U la ong ba ha ki por kiba la leit noh, ym shym la don kano kano ka jingpyrshah halor kane ka projek.
“Ki Dorbar Shnong kiba ïadei bad kane ka projek kim shym la pyrshah ha kano kano ka por, bad u MLA jong ka thaiñ ruh um shym la pyrshah. Kane ka mat ka lah ban mih ha ki snem 2023, 2024 bad 2025. Balei ba kine ki kynhun ki wanrah ïa ka jingpyrshah mynta ha u snem 2026?” u la kylli.
U Bah Lyngdoh u la pynkynmaw ruh ba ki jingbit kiba ïadei bad ka mariang ki dei ki sienjam kiba nyngkong eh kiba la shim ha u snem 2022, ha ka por ba um pat long satia u dkhot jong ka Ïingdorbar Thaw Aiñ ka Jylla.
Haba kylli la don ne em ki briew kiba don ïa la ki jong ki jingmyntoi shimet kiba donkti ha kane ka jingpyrshah, u la ong ba um ju bishar lypa ïa ki briew khlem da tip ïa ki jingshisha.
“Ngam ju bishar lypa ïa ki briew. Ngam tip la ki la pule bniah ïa baroh ki kot ki sla kiba ïadei bad kane ka projek ne la ïoh ïa ki jingbatai kiba biang. Hynrei, ka don ka por kaba biang ban mudui ne ban ujor halor kano kano ka kam,” u la ong.
Haba pynshai halor ka projek, u Bah Lyngdoh u la buh jingkylli la u President ka Ri India un mynjur ban wan buh ïa u mawnongrim jong ka projek kaba long pyrshah ïa ki nongrim ba kongsan jong ka jingpynneh pynsah ïa ka mariang.
“Phi mut ba uno uno uba bat ïa ka shuki President ka Ri India un mynjur ban ïadon bynta ha ka projek kaba don jingïakajia? U nongshong shnong uba ha khlieh duh jong ka Ri un wan ban buh ïa u mawnongrim jong ka projek kaba long pyrshah ïa ki nongrim ba kongsan jong ka jingpynneh pynsah ïa ka mariang?” u la kylli.
Haba jubab halor ka jingkynthoh ba ka jingthung dieng ha kiwei pat ki jaka kam lah ban bujli ïa ki dieng kiba la pom ha Lum Shyllong, u la ong ba la leh ïa ki jingbishar bniah kiba donkam shwa ban pyntrei ïa ka projek.
U la pynpaw ruh ïa ka jingbym hun halor ka jingduna ka jingïakren na ka liang ka Sorkar halor kane ka mat.
“Ka jingeh ka long ba katkum kaei kaba nga la ïohi ha ki khubor na ki kot khubor, ym shym la don mano mano na ka Sorkar kiba kloi ban kren halor kane ka mat. Nga hi nga la ju kren, nga dang bteng ban kren bad mynta ruh nga dang kren bad phi. Kumta, nga tharai kaei kaba duna ka long ka jingïakren,” u la ong.
