Shillong, Risaw 8: Ka Sorkar Jylla ka la pynkhlaiñ ïa ki sienjam ban ïakhun pyrshah ïa ki kam runar kiba ïadei bad ki drok, da kaba pynkhlaiñ ïa ki kynhun kiba peit ïa ka jingpynpoi bad jingdie ïa ki drok ha ka jylla.
Haba kren halor kane ka mat, Symbud Myntri Rangbah Bah Prestone Tynsong u la ong ba ka Sorkar ka la dep thaw ïa ka Mission Operation kaba la khlieh da u Francis Kharshiing, bad la thaw ruh ïa ka kynhun kaba kynthup ïa ki tnat bapher bapher, kynthup ïa ka Social Welfare bad kiwei ki tnat kiba ïadei bad kane ka kam.
“Haba ngi kren shaphang u drok, don ar tylli ki mat kiba kongsan. Kawei ka long ban lap bad pynsangeh ïa ka jingpynpoi ïa ki drok, bad kawei pat ka long ban ai jingïarap bad jaka sumar ne rehabilitation centre ïa kiba la ngop ha ka jingdih drok.”
U la ong ba ka rehabilitation kam dei ka kam kaba lah ban pyndep tang ha kawei ka sngi, hynrei kiba ngop ha ki drok ki donkam ban leit sha ki rehabilitation centre, ban ïoh counselling bad kiwei ki jingïarap haduh ba kin lah ban koit.
“Kane kam dei ka kam kaba lah ban pyndep tang shi sngi. Ngi hap ban phah ïa ki sha ki rehabilitation centre, ban ai counselling bad kiwei ki jingïarap, namar ka jingkoit na kane ka jingeh ka shim por.”
U Bah Prestone u la ong ruh ba na ka liang jong ka Pulit, la dep thaw ïa ka Anti-Narcotics Task Force (ANTF) kaba trei ban buddien ïa ka jingpynpoi drok na ki bynta bapher bapher jong ka jylla.
“Ka ANTF ka trei ban pynthikna ba ka jingpynpoi ïa ki drok kaba wan na ki bynta bapher bapher jong ka Meghalaya yn pynsangeh. Ym tang ban pynsangeh, hynrei ban kurup ruh ïa ki drok, bad kane ka kam kan dang bteng.”
U la pynpaw ruh ba ka Meghalaya kam lah ban ïakhun marwei pyrshah ïa ka jingwan jong ki drok, namar ki lah ban wan lyngba ki jylla marjan bad wat na shabar ka ri.
“Ngi donkam ruh ban ïatreilang bad ki jylla marjan bad ki counterpart jong ngi, namar ka Meghalaya marwei kam lah ban khang ïa ka jingpynpoi drok kaba wan na kawei ka jylla sha kawei pat, bad wat na shabar ka ri.”
Ha kajuh ka por, u la kyntu ïa ki paidbah ban ïatreilang bad ka Sorkar ban ïakhun pyrshah ïa ki drok bad kiwei ki kam runar.
“Ka jingïakhun pyrshah ïa ki drok kam dei tang ka kam jong ka Sorkar. Ki kmie ki kpa, ki khun, ka imlang sahlang bad ka Sorkar, baroh ngi donkam ban ïatreilang.”
U la kyntu ruh ïa ki paidbah ban long kiba husiar, khamtam haba ki hap ban leit shabar ha ki por mynmiet, bad ban pyntip sha ki bahaïing hasem ne ki briew kiba hajan shaphang ka jaka ba ki leit.
U Bah Prestone u la ong ba tang da ka jingïatreilang hapdeng ka Sorkar, ki Pulit bad ki paidbah, yn lah ban pynsangeh ïa ka jingpur jong ki drok bad ki kam runar ha ka jylla.
