SHILLONG : U Symbud Myntri Rangbah ka Jylla bad President ka NPP Meghalaya, Bah Prestone Tynsong, u la pyndonkam ïa ka pharshi na ka Phawer u Aesop shaphang u myrsiang bad ki soh kriep ban beiñ ïa ki Liang Pyrshah, ha ka rynsan ïalap elekshon na ka bynta u kyrtong ka NPP u Dr. DRL Nonglait, ha ka jingialang kaba long ha Mylliem.
Haba kren ha ka jingïalang ïalap elekshon kaba la pynlong da ka NPP Mylliem Block, u Bah Prestone u la ong ba kito kiba beiñ ïa ka Sorkar ba la lamkhmat da u Conrad K. Sangma ki la pynbiej ïa ki paidbah, kumba u myrsiang u la leh ha katei ka pharshi.
“Ïa kane ka pharshi nga kynmaw ha ki por ba nga dang pule ha skul, ha kaba nga pule ïa ki pharshi jong u Aesop,” la ong u Bah Tynsong.
Haba batai ïa ka jingmut jong kane ka pharshi, u Bah Tynsong u la ong, “Ka jingmut kaba nga kwah ban pynsngew ka long ba, ha baroh kine ki mat kiba la ïakren, ngi ïohi da ki khmat briew ïa ki kam kiba ngi, kum ka Sorkar, ngi pyrshang ban leh hapoh ka jingïalam jong u Conrad K. Sangma. Don kiba ong ba kane ka jingpynlut pisa ka palat pud. Don kiba ong ba naduh Umshyrpi haduh Banuin, ka long kumba ñiah kali ha ka surok kaba sniew. Nangta ki sdang ban kdew ïa ki dur jong u Prestone, u Conrad bad u Sniawbhalang, da kaba ong ba u soh grape u long uba jew.”
“Bad kaba lyngngoh ka long ba bun ki briew ki ngeit ïa kata. Kumta, nga kwah ban ong ïa ki kmie, ki kpa bad ki khun samla, sngewbha bishar bniah shwa,” u la bynrap.
