Ym don jingma ei ei ia ka sorkar MDA hapoh jingialam ka NPP ha Meghalaya : Conrad
SHILLONG : U Myntri Rangbah ka jylla Meghalaya, u Conrad K. Sangma, ha ka Balang u la ong ba ym don jingma eiei ïa ka Sorkar MDA kaba ïalam da ka NPP hadien ba ki 8 ngut ki MLA jong ka UDP ki la pynïasoh sha ka BJP. U la ong ruh ba ka BJP kam shym la dawa shuki myntri shuh ha ka kynhun myntri.
Ka jingbun paid ka BJP ha ka ïingdorbar kaba don 60 ngut ki MLA ka la kiew sha 10 ngut, hadien ba ki 8 ngut ki MLA jong ka UDP ki la pynïasoh sha ka BJP ha New Delhi ha ka sngi Balang. Kumta mynta ka BJP ka la long ka party kaba don bun tam ki MLA hadien ka NPP hapoh ka MDA.
Haba kren bda ki lad pathai khubor u Myntri Rangbah u la ong, “Ka dei ka rai hapdeng ki ar tylli ki party saiñpyrthei, bad ka dei ruh ka rai jong ki MLA jong kitei ki party. Kam don jingïadei bad ka NPP. Kumta, ka dei ka mon bad ka rai jong ki MLA, bad ngam don eiei ban ong halor ka rai jong ki.”
U Myntri Rangbah u la pynshisha ba kar jingïatreilang ha ka sorkar ka dang neh kumjuh. U la ong, “Kumta, kane kam pynjulor ïa ka rukom treikam jong ka sorkar jong ngi. Bad wat lada ka long kumta, kumba phi tip, ngi dang don ka jingbun paid ha ïingdorbar. Kumta ngi don ka jingshaniah ba baroh kin ïaid kumba ju long.”
Hynrei u la ong ruh ba lah ban don ki jingeh hapdeng ki ar tylli ki party, namar ki MLA jong kawei ka party ki la iehnoh ïa ka party bad leit pynïasoh sha kawei pat ka party. U la ong ba ki party kin hap ban pynbeit ïa kane. Hynrei halor ka daw jong ka jingpynïasoh bad kaei ka jingthmu jong ki, u la ong ba um lah ban ai jingkynthoh.
Haba la kylli la kan don ne em ka jingkylliang shuki Myntri, u Myntri Rangbah u la ong, “Nga la kren shai lypa, kane kan ym ktah eiei.”
Haba la kylli lada ka BJP ka la dawa shuh ne em ki shuki Myntri ha ka Kynhun Myntri, na ka liang u Myntri Rangbah u la ong ba na ka liang jong ki, kim shym la pan ei ei.
Shuh shuh haba kren halor ka jingkiew jong ka BJP ha Meghalaya, u Conrad u la ong, “Kan ym don jingma (ia ka NPP) haduh mynta. Kawei pa kawei ka seng saiñpyrthei ka kwah ban nangkiew. Ha ka synshar paidbah bad ha ka saiñpyrthei, kawei pa kawei ka party ka angnud ban nangkiew. Ngi ruh ngi kwah ban nangkiew ha ki jylla bapher bapher. Ngi la trei ha Manipur bad kiwei pat ki jylla. Kane ka dei ka bynta kaba ju jia, kumta kam long kaba phylla. Ngi hap ban trei ban pynthikna ba ka nongrim jong ngi kan neh skhem.”
U la bynrap, “Ngi hap ban pynthikna ruh ba ha kane ka jinglong jong ka kam baroh, ngin lah ban leh ïa ka bynta jong ngi ban pynbun ïa ka jingdon ki seat jong ngi. Ki elekshon kin dang wan bun. Nga la kren shai barabor ha phi baroh ba ngi ju ïakhun da ki kyndon jong ngi hi, kum ka party kaba don ïa ka jong ka jingithuh, bad kane kan bteng ruh ha ki snem ban wan.”
