SHILLONG : U Myntri Rangbah ka Meghalaya, u Conrad K. Sangma, ha ka Balang u la pynshai ba ka jingkynad kaba dang shen ha khappud hapdeng Meghalaya bad ka jylla ba marjan, kaba mih hadien ka jingjia ha Maikhuli, kam dei ka jingjia kaba thymmai. U la ong ba ki jingïakynad kum kine ki la jia na ka por sha ka por la jan 54 snem, naduh ba Meghalaya ka la ioh ïa ka jylla bapura.
Ha ka jingiakren bad ki lad pathai khubor, u Myntri Rangbah u la ong, “Kine ki jingïakynad ha khappud ki la jia la 54 snem naduh ba ngi la ioh ïa ka jylla. Kam dei ka jingjia kaba dang shu mih mynta ne dang shen. Ki jingïakynad ki ju mih na ka por sha ka por namar ki don ki jingïapher ha ki katto katne ki bynta, bad ki jingpynsngewthuh bakla ruh ki lah ban jia ha kine ki jaka.”
U la ong ba ka Sorkar ka dang ïai trei lyngba ka jingïakren bad jingïatreilang bad ka Sorkar jong ka jylla ba marjan ha ki kyrdan bapher bapher, khnang ban pynbeit ïa ka jinglong jingman bad ban pynthikna ïa ka jingsuk ha khappud.
U Myntri Rangbah u la ong, “Ka lad kaba donkam tam bad kaba neh ban pynkut ïa kane ka jingeh ka long ban ioh ia ka jingïapynbeit kaba neh. Hynrei kane kam dei ka kam kaba lah ban pynbeit noh marwei, namar ka dei ka mat kaba la don mynta la 54 snem.”
U la bynrap ba ka Sorkar ka dang ïai trei ban pynbeit ïa ka jingïakajia khappud, bad ha ki katto katne ki jaka, ka la don ka jingkiew shaphrang ha ka jingïapynbeit.
“Kumba phi tip, ha katto katne ki jaka ngi la lah ban shim ki sienjam shaphrang bad ban shem ïa ki lad ban pynbeit ïa ki jingïapher. Ngin bteng ban trei ban shem ïa ki lad pynbeit na ka bynta kiwei pat ki jaka ruh. Hynrei kane ka dei ka mat kaba eh, bad dei na kane ka daw ba bun ki Sorkar ha kine ki 54 snem kiba la dep kim shym la lah ban pynbeit ïa ka jingïakajia,” u la ong.
U Conrad u la pynpaw ruh ba ka Sorkar kan bteng ban trei halor kane ka mat, khamtam ban pynthikna ba kino kino ki jingïapher jingmut ne ki jingeh kiba mih ha ki jaka khappud kin lah ban pynbeit khnang ban pynneh ïa ka jingsuk bad ka jingïaineh jong ka jingïadei hapdeng ki paidbah.
“Ngin bteng ban trei halor kane ka mat bad, kaba kongsan tam, ngin pynthikna ba kino kino ki jingïapher bad ki jingeh kiba mih, yn pynbeit ïa ki hapdeng jong ki, khnang ban pynthikna ba ka jingsuk kan neh,” u la bynrap biang.
