SHILLONG : Ka Sorkar Meghalaya ka la jan dep artad ïa ka jingpynbeit halor ka jingkynriah ïa ka Harijan Colony na Them Iew Mawlong, la ong u Symbud Myntri Rangbah ka Jylla ba khmih ïa ka tnad Urban Affairs, u Bah Sniawbhalang Dhar.
U la ong ba ka jingtip kaba bniah halor ka plan ne ka blueprint ban pynkynriah ïa ki nongshong shnong na katei ka jaka yn pynbna paidbah hadien ba la dep ïa baroh ki jingïakren pynbeit.
Haba kyntait ban ai jingtip bniah ha kane ka por, u Dhar u la ong, “Kane ka dei ka kam jong ka Sorkar Jylla, kumta ngan batai ïa phi ha ka por kaba dei, ym mynta. Ngi la dep ban pynlong ïa ka jingïalang ha ka taïew ba la dep, bad mynta ngi la jan poi sha ka rai kaba kut. Ym dei ban shu antad, hynrei ban pyndep kloi katba lah — kata ka dei ka kyntien kaba dei ban pyndonkam.”
U la ong ba ym lah ban pynpaw paidbah ïa ka blueprint katba ki jingïakren bad jingïasngewthuh jingmut ki dang ïaid shakhmat.
“Haba la dep ban pynkut ïa baroh ki jingïakren bad shim ïa ka rai kaba khatduh, phin sa ïohi ïa ka blueprint. Ngam lah ban ai ïa ka blueprint mynta namar ki jingïakren ki dang ïaid,” u la ong.
