SHILLONG : U Symbud Myntri Rangbah ka Jylla, u Bah Sniawbhalang Dhar, ha ka sngi Palei, u la ong ba ka Sorkar kam dei ban ïaknieh jingïaroh halor ka jingpyrshang ban pynrung ïa ka ktien Khasi ha ka Eighth Schedule jong ka Riti Synshar ka Ri, hynrei ka dei ban pynleit jingmut ha kaba trei na ka bynta ki paidbah.
Haba jubab halor ki jingkam bad jingkynthoh jong ki kynhun bapher bapher halor mano ba dei ban ïoh ïa ka jingïaroh na ka bynta ka jingpyrshang ban pynrung ïa ka ktien Khasi ha ka Eighth Schedule, u Dhar u la ong, “Ngi dei ki nongtrei, ngi dei kiba leh ïa ki kam. Ngin sngewkmen la mano mano ruh ba ïoh ïa ka jingïaroh, katba ki paidbah ki sngewkmen. Ngim shong ha Secretariat ban ïaknieh jingïaroh, hynrei ngi shong hangta ban leh ïa kaba donkam khnang ba ki paidbah kin im suk bad shongsuk.”
U Bah Dhar u la ong ba ka Inner Line Permit (ILP) bad ka jingpyrshang ban pynrung ïa ka ktien Khasi ha ka Eighth Schedule ki la ïoh ïa ka jingkyrshan lang jong baroh ki dkhot ka Ïingdorbar Thawaiñ, bad ka Sorkar ka dang buddien ban pynurlong ïa kine ki mat.
“Haba ïadei bad ka ILP, baroh 60 ngut ki dkhot jong ngi ki la mynjur bad mynjur ïa ka rai hapoh ka Ïingdorbar Thawaiñ. Dei na kata ka daw ba u Myntri Rangbah u la leit ha kine ki bnai ba la dep ban kyrpad ïa ka Sorkar India. Haba ïadei bad ka ktien Khasi ruh, la mynjur ïa ka rai hapoh ka Ïingdorbar Thawaiñ, bad ma ngi ngi dang buddien ïa kane ka kam,” u la ong.
