Shillong, Nailur : U Myntri Rangbah ka Meghalaya, u Conrad K Sangma, ha ka sngi Palei u la ong ba baroh 56 tylli ki C&RD Block ha Meghalaya ki la dep pynbha pura ne la ai da ki ïing thymmai ha kine ki lai snem ba la dep, kum shi bynta na ka jingpynkhlaiñ ïa ki jingtei jong ka sorkar ban pynbha ïa ka jingshakri paidbah ha ki thaiñ nongkyndong.
U Sangma u la kren ïa kane hadien ba u la plie paidbah ïa ka Block Integrated Development Complex jong ka Rongara C&RD Block ha South Garo Hills District. U Siju-Rongara MLA, u Rakkam A Sangma, u la don lang ha kane ka jingïalang.
U Myntri Rangbah u la ai jingïaroh ïa ka jingtrei shitom jong u MLA ka thain halor ka jingpyntrei ïa kane ka complex bathymmai na ka bynta ka thaiñ, bad u la kyntu ïa ki ophisar ban shakri ïa ki paidbah da ka jingaiti lut.
U la ong ba ki paidbah ki wan sha ki ophis jong ki block ryngkat bad ka jingkyrmen, bad kumta ki jingeh jong ki ruh dei ban pynsngap da ka jingïaishah bad ban pynbeit.
U la ong ba ka sorkar ka dang iai aiti ban pynjan ïa ka jingsynshar sha ki paidbah bad ban pynsted ïa ka roi ka par ha ki thaiñ nongkyndong bad ha ki thaiñ khappud.
