Shillong, Risaw 08: U Myntri ka tnat Pule Puthi, Bah Lahkmen Rymbui, u la ong ba ka jingpule kam dei tang ka lad ban ïoh kam ha ka Sorkar, hynrei ka long ka atiar ban pynkhreh ïa ki samla ban ïakhun bad kner ïa ki jingeh kiba wan ha ka jingim bad ban lah ban ïeng ha la ki jong ki kjat.
Haba kren ha ka jingïalang rakhe ïa ka 100 snem ka St. Joseph’s Secondary School, Laitkor, East Khasi Hills, u Bah Rymbui u la ban jur ïa ka jingdonkam ban ithuh bad pynroi ïa ki sap bad ki talent bapher bapher jong ki khynnah, ryngkat bad ka jingpule kaba ju long.
U la ong ba ka Sorkar Meghalaya ka la shim ïa ki katto katne ki sienjam ban ai lad ïa ki samla ban kyntiew ïa ki sap bad jingshakri jong ki, bad u kyntu ïa ki khynnah pule ban wad ïa ki sap kiba ki don hapoh jong ki. U la ong ruh ba ym don ka kam kaba rit ne kaba khraw, namar baroh ki kam ki don ka bynta jong ki.
U Myntri u la kyntu ruh ïa ki nonghikai ba kin ïai pynbiang bad pynkylla ïa ka jingtip jong ki lyngba ka jinghikai thymmai bad ka jingpyntbit, khamtam ha kane ka juk kaba ka teknoloji ka dang ïaid shakhmat stet.
Ka St. Joseph’s Secondary School, Laitkor ka la rakhe ïa ka Centenary Year (1926-2026) da ka jingïalang ban burom bad pynkup burom ïa ki nonghikai mynta, ki nonghikai barim bad ki khynnah skul kiba la pyndep ïa ka jingpule ha kane ka skul.
Ha kane ka jingïalang, u Bah Lahkmen Rymbui u la long u Kongsan, ha ka jingïadonlang u MLA ka BJP na Pynthorumkhrah, Bah AL Hek, Fr. Francis Kharpran, ki nonghikai, ki nonghikai barim, ki kmie ki kpa bad ki khynnah pule.
Ha ka jingrakhe la don ruh ki jingshad bad jingrwai na ki khynnah, ryngkat bad ki jingpynkynmaw ïa ka jingïaid lynti jong ka skul ha kine ki 100 snem bad ka bynta kaba ka la noh synñiang ha ka liang ka pule puthi.
Haba kren kum u Symbud Kongsan, u Bah AL Hek u la ai jingïaroh ïa ki nongrim jong ka skul kiba la wanrah ïa ka jingshai jong ka jingpule sha Laitkor.
U la kyntu ïa ki khynnah pule ban trei shitom, ban ïaineh ha ka por jong ki jingeh bad ban tip bha ïa la ki jong ki bor, sap bad ka jinglah.
Ka jingrakhe ïa ka jingdap 100 snem ka St. Joseph’s Secondary School ka long kawei na ki bynta kiba kongsan ha ka histori jong ka skul, kaba burom ïa ka jingtrei jong ka skul ha ki snem kiba la leit bad ai mynsiem ïa ka pateng kaba mynta ban bteng ïa ka jingtrei jong ka ha ka liang ka pule puthi bad ka jingshakri.
