Tang ka NPP kaba dei ka National Party na ka Thaiñ Shatei Lam Mihngi, dei ka NPP ba pynlait ïa ka Meghalaya na ka CAA

SHILLONG : U President ka NPP Meghalaya bad u Symbud Myntri Rangbah ka Jylla, Bah Prestone Tynsong, u la ong ba ka NPP ka dei tang kawei ka seng saiñ pyrthei na ka Thaiñ Shatei Lam Mihngi kaba la ioh ïa ka jingithuh kum ka National Party, bad u la ai ka jingïaroh ïa ka seng halor ka jingpynlait ïa ka Meghalaya na ka Citizenship Amendment Act (CAA) bad ka jingpyrshang ban tuklar halor ka jingpynkylla ïa ka Foreign Contribution Regulation Act (FCRA).
Haba kren ha ka jingïalap elekshon jong ka NPP ha Mylliem na ka bynta u kyrtong ka seng ha ka elekshon shiteng samoi sha Lok Sabha na Shillong, u Dr. DRL Nonglait, u Bah Tynsong u la ong ba ka jingioh jong ka seng ïa ka kyrdan National Party ka la wanrah ïa ka jingithuh bad ki jingmyntoi kiba shisha na ka bynta ka Jylla.
“Pyrkhat bha, na ki phra tylli ki Jylla jong ka Thaiñ Shatei Lam Mihngi, tang ka NPP kaba dei ka National Party. Wat ka Assam ruh kam don wat tang kawei ka National Party. Haba ngi ong National Party, ka mut ba ka Election Commission ka la bishar bniah na baroh ki liang ban rai ka seng aiu kaba dei hok ban ioh ïa kane ka kyrdan,” la ong u Bah Tynsong.
“Ka dei ka jingieit kyrpang jong U Blei ïa ka Meghalaya. Ha u snem 2019, ka Election Commission of India ka la pyntip ïa u President jong ngi, u Conrad K. Sangma, ba ka NPP ka la biang ban ioh ïa ka jingithuh kum ka National Party,” u la ong.
Haba kdew ïa ki jingmyntoi kiba wan na kane ka kyrdan, u Bah Tynsong u la kdew ïa ka ophis jong ka seng kaba don ha North Avenue, New Delhi.
“Ka Sorkar India ka hap ban ai ïa ka ophis ha Delhi. Mynta ka NPP ha Delhi ka don la ka jong ka ophis ha kaba la pyni ïa ki dur jong u P.A. Sangma, u Conrad K. Sangma bad jong nga. Hapdeng ki seng saiñ pyrthei ha ka Thaiñ Shatei Lam Mihngi, don ne em kano kano ka seng kaba la mih na kine ki Jylla bad kaba don la ka jong ka ophis ha Delhi? Ym don wat tang kawei ruh,” u la ong.
U la ong ruh ba watla ka Meghalaya ka dei ka Jylla kaba rit ha ka jingbun briew, hynrei ka nongbah Delhi ka la ithuh ïa ka.
“Ka Meghalaya ka dei ka Jylla kaba rit ha ka jingbun briew, hynrei ka nongbah Delhi ka tip ïa kane ka Jylla. Naduh u snem 2019 bad shwa kata, ym don ba kren shaphang ka Meghalaya. Hynrei naduh u snem 2019, tang shu ong Meghalaya, ki kynmaw ïa ka North Avenue ha Delhi,” u la ong.
Haba kynmaw ïa ki jingïakhih pyrshah ïa ka Citizenship Amendment Bill (CAB) ha u snem 2019, u Bah Tynsong u la ong, “Ngi kynmaw ïa kaba la jia ha u snem 2019 ha ka por jong ka CAB, ha kaba ka la long kumba ka Thaiñ Shatei Lam Mihngi baroh ka la klang ding. U Conrad K. Sangma u la ialam ïa ka kynhun jong ki seng saiñ pyrthei na ka Thaiñ Shatei Lam Mihngi bad ki kynhun sengbhalang na Meghalaya ban leit ïakynduh ïa u Amit Shah. Ngi la ong ba ka Meghalaya ka dei ban treikam katkum ka Sixth Schedule. Kane ka la rung ha ka jingmut jong u Amit Shah. Hadien shi taïew, u la pyntip biang ïa u Conrad bad ong, ‘Ka long kaba shisha ba ka Sixth Schedule ka treikam pura ha Meghalaya, lait noh ha katto katne ki jaka kiba la tip kum ka European Ward. Dei na kata ka daw ba yn ym pyntreikam ïa ka CAA ha Meghalaya’.”
“Pyrkhat bha, kiwei pat ki Jylla ki pyntreikam ïa ka, hynrei ha Meghalaya ym pyntreikam ïa ka. Kine ki long ki dak kiba pyni ïa kaei kaba ka seng ka leh,” u la ong.
Haba kren halor ka Foreign Contribution Regulation Act (FCRA), u Bah Tynsong u la ong, “Mynta don sa kawei pat ka mat kaba baroh ha ka Thaiñ Shatei Lam Mihngi ki sheptieng, kata ka jingpynkylla ïa ka FCRA. Lyngba ka NPP bad lyngba u President National jong ngi, uba long ruh u Myntri Rangbah ka Jylla, u Conrad K. Sangma, u la ialam ïa bun tylli ki kynhun niam ban leit ïakynduh ïa ki nongïalam ha Delhi. Namar kata, la phah ïa ka Bill pynkylla sha ka Joint Parliamentary Committee (JPC) ban bishar bniah ïa ka.”
“Na ka Thaiñ Shatei Lam Mihngi, ym don wat tang uwei ruh u dkhot ha ka JPC. U Conrad u la leit biang ban ïakynduh ïa u Speaker bad ha kaba kut, u Speaker u la thung ïa u James P.K. Sangma. Hato kata kam dei ka burom?” u la ong.
U Bah Tynsong u la ther ruh ïa kito kiba kynnoh ïa ka NPP ba ka dei ka seng nabar ne ka seng jong ki Garo.
“Nga kwah ban kylli, ki kyntien aiu kiba kim pat pyndonkam ban kawang maw ïa ka NPP? Ki ong ba ka NPP ka dei ka seng jong ki Dkhar, ka seng jong ki Garo, bad ka seng kaba ym lah ban ïakren. Phi lah ban kawang maw katba mon, hynrei kawei ka sngi phin sa ong ba ngi donkam ïa ka jingkyrshan jong ka NPP,” u la ong.
Ha kaba kut, u la kyntu ïa ki paidbah ban ai ka jingkyrshan kaba pura ïa u Dr. Nonglait.
“To ngin trei lang bad ai ka jingkyrshan kaba pura ïa u Dr. Nonglait, khnang ba un jop bad long u MP jong ngi. Un ïoh ruh ban shong ha kata ka jaka ha kaba ngi la buh ïa ka ophis jong ngi, khnang ba ki paidbah ka Meghalaya kin sngew shngaiñ bad kin ïoh mynsiem haba ki ïohi ïa ki dur jong ki nongïalam kiba khraw na ka Jylla kaba rit kum ka Meghalaya,” u la ong.