Shillong: Ka Sawmer SC ka la lah ba kan pynliem ia ka Mylliem SC da 2-1, kaba long artad ka jingiakhun ba khatduh na ka bynta kine ki ar kynhun ha kane ka samoi ialehkai ba mynta ka Shillong Premier League, ba la long hynne ka nohphai sngi ha SSA Stadium.
Ka jingiakhun ka long ba u Daohipaia Rymbai (45′), u la lam khmat ia ka Mylliem ba kan tam shakhmat, ia kaba ym slem hadien kane, ka Sawmer SC ka la ieng iakhun tyngeh ban wanphai biang sha kane ka jingiakhun da ka jingioh ban thep ia ki artylli ki kol ba la wan lyngba u Banteilang Lyngdoh (77’) bad Bickyson Kharkongor (81’).
Da kane ka jingjop, ka Sawmer (12 point) kan kiew joit sha ka kyrdan kaba san kaba lah ban plie lad pat ia ka ban ioh aireng sha sa kawei pat ka lympung katta ka SSA Super Cup kaban sa long marsien kut ki jingiakhun ba dang sah jong ka SPL, hynrei ia mynta ka Sawmer kan dang hap shwa ba kan iai ap ia ki resol ban mih na ki jingiakhun kiba dang sah, namar ka MLP FT (11 point) bad Rangdajied United FC (10 point) ki lah ban iaknieh lem sha kane ka thong ban ioh rung sha ka kyrdan ka Top 6.
Haba phai sha ka kynhun ialehkai ka Mylliem, ka la pynkut ia la ka samoi ialehkai ka jong ka da kaba don sha trai duh ka miej iakhein point, hadien ba ka la ioh tnoit tang shi point bad ban khreh ban hiar biang noh pat sha ka kyrdan iakhun ka First Division.
Hynrei ha ka jingiakhun kaba mynta ka sngi, ka Mylliem marsien ia sdang jong ka kylla step, ka buit ne rukom ialehkai ka jong ka, ka long ban pyrshang ban pynkhih ia ia ka jar da kaba ialeh ban shut jam beit kham na sha jngai, kaba ha kum kane ka jingpyrshang, ba u Daohipaia dain u la khyrwit ia ka bol kaba la sam lyngba ia u rang ap kol ka Sawmer u Urbanity Makhroh.
Marsien ia wan ban bteng ia ka kylla miet, ka Sawmer SC ka la kyntiew bha ia la ka rukom ialehkai ka jong ka bad ka la jan ioh ia ka kabu ban pyniakhaid hadien ba u Diego Khyriem u la khyrwit jam bha ia ka bol, hynrei kam shim la poi sha ka thong kaba u la thmu.
Hapdeng ka jingiai bteng ban jam shakhmat ka jingiakhun ba u Banteilang u la ioh ia ka kabu ba paka ban shut ia ka bol kaba la khun bha tad haduh ba u Franklyn Surong, rang ap kol ka Mylliem um shim la lah ban leh eiei shuh ia ka.
Hadien kane, ka defend line ka Mylliem khyndiat ka la sdang ban synjor bha, kaba la shat ia ki khmat ka kynhun ialehkai ka Sawmer, ba ka kabu ksiar kum ban ioh ban thep biang ia ka kol kan nym long kaba eh, bad da kumta u Diego u la lah ban rah wut shakhmat bad ban iarap ban pynbuh sha u Bicky uba la pyndep ia ka kamram ban pynkhih ia ka jar.
Lashai pat ka sngi ka MLP FT kan iakhun pyrshah ia ka Laitkor SC ha ka por 3 baje nohphai sngi.
