SHILLONG : U MP ka Rajya Sabha, James Pangsang Kongkal Sangma, ha ka Sngi Thohdieng u la kular ïa ki nong shet ja sngi ha ki skul bad ki nongiarap ha ki Anganwadi ba un rah ïa ka jingdawa jong ki ban kyntiew ïa ka tulop sha ka Sorkar Pdeng.
Ka kynhun jong ki nong shet jingshet bad ki nongiarap ka la leit ïakynduh ïa u MP ha Shillong ban pynsngew ïa ki jingeh jong ki halor ka tulop kaba rit.
“Ki la wanrah ïa ki jingeh jong ki halor ka jingsiew ba ki ïoh, bad ki la pynsngew ba kane kam pat biang, bad donkam ban pynbeit thymmai ïa ka jingsiew,” la ong u James.
U la ong ba u la kular ïa ka kynhun ba yn sa rah ïa ki jingeh jong ki sha ki bor kiba halor.
“Kum u MP na Meghalaya, ngan rah ïa ki jingeh jong ki sha ka Sorkar India, khnang ba yn lah ban shimkhia ïa ki jingdawa jong ki bad ba ka Sorkar kan tip ïa ki jingeh bad ki jingtynjuh kiba ki mad,” u la ong.
“Ngan pynsngew tyngeh bad kyrpad ïa ka Sorkar India ban sngap ïa ki jingdawa jong ki, khnang ba yn lah ban shem ïa ka lad ban pynbeit ïa kane ka kam,” u la bynrap.
