SHILLONG : U Treasurer ka NPP Meghalaya, Bah Daniel Thangkhiew, u la ong ba ki jingpyrshang ban pynkhyllem ïa ka Sorkar ba la lamkhmat da ka NPP kin ym lah ban jop, da kaba pynskhem ba ka party ka dang ïatylli bad nang kiew shuh shuh ha ka jingkhlaiñ.
Haba kren ha ka jingïalang ïalap elekshon ha Mylliem kaba la pynlong da ka NPP Mylliem Block ha ka miet Palei, na ka bynta u kyrtong ka seng ha ka elekshon shiteng samoi sha Lok Sabha na Shillong, u Dr. DRL Nonglait, u Bah Thangkhiew u la ong ba ki don kiba pynsaphriang ïa ki khubor lamler ba ka Sorkar kan sa khyllem.
“Ki don bun ki bor kiba kwah ban pynjem bad pynhap ïa kane ka Sorkar ba la lamkhmat da ka NPP. Hynrei lada phi peit ïa ki nongïalam kiba stad kum u Myntri Rangbah ka Jylla, u Bah Prestone Tynsong bad u Bah Sniawbhalang Dhar, ym don ba lah ban pynhap ïa ki,” u la ong.
U la ong ba ki khubor hamsaia ha ki kot khubor bad ki lad pathai khubor social media kiba ong ba ka NPP kan sa khyllem, ki long tang ki jingkynnoh kiba khlem nongrim.
“Ki Symbud Myntri Rangbah jong ngi ki la ïakren bad ki lad pathai khubor na ka por sha ka por bad pynshai ba kam don satia kum kata. Nga trei ha Secretariat bad u Myntri Rangbah, bad nga ruh nga la ai ïa ka jingpynshai lyngba ki lad pathai khubor. Ha kine ki khyndiat sngi kiba la dep, baroh ki MLA ka NPP ki la ïakynduh lang ha ïing u Myntri Rangbah bad ym don ba thmu ban iehnoh ïa ka party,” la ong u Bah Thangkhiew.
U la ong ba u Myntri Rangbah u ju pynlong jingïalang man la u bnai bad ki MLA ban ïakren halor ki kam pynroi ha ki constituency jong ki, bad u la kyntu ïa ki paidbah ba kim dei ban shah pynbiej ha ki khubor hamsaia.
U Bah Thangkhiew u la kam ruh ba ka NPP ka dei tang kawei ka seng saiñ pyrthei kaba dang nang kiew ha ka Jylla.
“Ka dei tang ka NPP kaba dang nang kiew man la ka sngi. Ka jingwan pynïasoh jong ki paidbah bad ki nongïalam ka paw tang ha ka NPP,” u la ong.
Haba kyntu ïa ki nongthep vote ha Mylliem, u Bah Thangkhiew u la phla ba ka seng ka la rem lai sien lynter ha ki elekshon kiba la dep ha katei ka Block, kata ka elekshon MP ha kaba ka Ampareen Lyngdoh ka la long ka kyrtong, ka elekshon MDC bad ka elekshon MLA ha u snem 2023 ha kaba u Bah Hamletson Dohling u la long u kyrtong.
“Kane ka dei ka sien kaba saw ba ngi wan sha kane ka jaka. Nga ïeng hangne da ka mynsiem kaba rit ban kyrpad ïa phi ba to pynlong ïa kane ka sien kaba saw kum ka sien kaba rai kut bad ai ïa ka jingkyrshan kaba pura ïa u Dr. DRL Nonglait. Ka pyrthei baroh ka tip ïa ki kam kiba u la leh, ïa ka jingnang jingstad jong u bad ïa ka jingthmu babha jong u,” u la ong.
U la ong ba ka NPP ka la nang khlaiñ ha Mylliem namar ba u MLA barim ka Congress, Bah Ronnie V. Lyngdoh, bad u kyrtong MLA jong ka elekshon 2023, u Bah Gill Laloo, ki la wan ïeng lang ha kajuh ka rynsan bad ka seng.
“Ka Mylliem ka la long kawei. Da ka jingwan jong u Bah Ronnie, ka jingdon jong u Bah Hamlet ka la nang khlaiñ shuh shuh. Ha ki snem kiba la leit noh, ngi la ïaleh pyrshah iwei ïa iwei pat, hynrei mynta da ka jingwan pynïasoh jong ki paidbah jong u sha ka NPP, ka seng ka la nang khlaiñ,” u la ong.
U Bah Thangkhiew u la ai khublei ruh ïa ka Sorkar bad ïa u Myntri ba dei khmih ïa ka tnat PWD, Bah Prestone Tynsong, halor ki projek surok. U la ong ba ki jingtyrwa halor ki skhim bapher bapher ha Mylliem, kiba la buddien da u Bah Hamlet Dohling, ki dang ïaid shakhmat.
Haba pynskhem ïa ka jingkyrshan jong u ïa ka jingïalam jong ka seng, u la ong, “Nga pynthikna ïa u President ka Jylla, Bah Prestone, bad ïa u kyrtong, Dr. Nonglait, ba ka NPP Mylliem Block ka la nang khlaiñ bad kan ai ïa ka jingkyrshan kaba skhem bad kaba pura.”
Haba ktah ïa ki seng Liang Pyrshah, u Bah Thangkhiew u la ong ba ki la duh noh ïa ki nongrim bad ki mat ban ïakhun, bad mynta ki pyrshang ban pynbiej ïa ki paidbah.
“Ngi dei ban ïatylli bad ym dei ban shah pynbiej ha ki khubor social media. Kiwei pat ki seng ki la duh noh ïa ki mat ban ïakren, bad mynta ki wad mat thymmai ban pynbiej ïa ki paidbah. Hynrei ngi long kiba shai ha ka jingmut bad kiba sheptieng ïa U Blei. Ka long ka jingkyrkhu kaba khraw ïa ngi ban ioh ïa u kyrtong kum u Dr. Nonglait, uba la pynlut por ha ka pule puthi, uba don ïa ka kyrdan bad uba sheptieng ïa U Blei bad shakri ïa U Blei,” la bynrap u Bah Thangkhiew.
