Shillong: Ka Mawlai Sports Club, kaba dang shu ioh ba kan rah ia ka nam kum ka lahduh jong ka lympung ialehkai Shillong Premier League kan hiar madan biang sa shisien ba kan iakhun pyrshah ia ka Nongkseh SSCC, ha ka jingiakhun ka semifinal ba nyngkong ka lympung SSA Super Cup 2026, kaban long lashai ka sngi ha SSA Stadium, kaban sdang ha ka por 5 baje janmiet.
Kane ka jingialehkai kan sei madan ia kawei na ka jingiakhun hapdeng ki artylli ki kynhun kiba kynsai bad la khmih lynti ba kin sei madan ruh ia ka jingiakhun kaba itynnad, iakhaid bad ka thong hi ka long ba kine ki ar kynhun ki ia tbeh sha ka thong ka nam ka burom.
Hadien ka jinglah ban ioh ban rah ia ka nam kum ka lahduh ka SPL, ka Mawlai SC ka la ap lypa ialade sha ka semifinal ryngkat bad ka Shillong Lajong FC, kaba wan ba-ar (runners-up), ha kaba kan iakhun pat ia ka MLP FT ha ka semifinal kaba ar kaban long ha ka sngi Saitjain.
Haba phai sha ka kynhun ialehkai ka Nongkseh, ka la lah ba kan bat ia ka kyrdan kaba lai ha kaba kut ka SPL, kaba pynlong ia ka ba kan hap ba kan iaid lyngba ka playoff ba kan lah ban pat ban pynliem ia ka Sawmer SC da 4-2.
Lada yn ia kyrtiang dien sha ka jingiakhun hapdeng kine ki ar kynhun ha ka SPL mynta ka snem, shipor, I kumba kan khreh ban jam sha kaba iakhaid, pynban u Damanbhalang Chyne, ka Mawlai, u la ioh ba un thep ia ka shi kol, kaba la wan lyngba ka freekick, kaba dei artad ha ka khyllipmat ba la pynjlan ia ka por jong kane ka jingialehkai ha ka kylla miet, kaba biang pura ia kane ka kynhun ba kan khur ia ka jingjop lem bad ia ka lai point ba pura, dei lyngba kane ka jingjop, ka pynlong syndon ruh ia ka Mawlai ba kan iai bteng ban jam shakhmat tad haduh ba kan da ioh ba kan rah mynta ka samoi ia ka nam kum ka lahduh ka SPL.
Kumta kane ka jingiakhun, kan dei ka kabu kaba ia ka Nongkseh ba kan iakhun ban ioh ia ka khur ia ka jingjop, hynrei ka Mawlai, khlem pep kan ialeh ban pynskhem ialade kum ka kynhun kaba tbit bad kaba khlain, kaba hangne lah ruh ban ong ba kan khring bha ia ki khmat u paidbah uba ieit bad ba sngewtynnad ia ka phutbol.
