Shillong: Ki khynnah shynrang bad kynthei, ki la ieng iakhun da kaba ia bok tyngeh beit tlam tlam, kum shi bynta ban kynjoh sha ka thong ban ioh ban khur ia la ki nam jop ha ki kyrdan iakhun bad jingkhia bapher bapher jong ka rynsan ialehkai ba la tip ia ka kum ka State Sub Junior Boy’s & Girls U-15 Years Boxing Championship, kaba lai sngi ba la pynlong ia ka da ka Meghalaya Boxing Association (MBA), ha madan ialehkai basketball jong ka Raid Laban College, ha Madan Laban Shillong.
Ia kane ka lympung ialehkai, la, la lah ban pynlong da ka jingiarap bad bei pisa da ka tnat jong ka Directorate of Sports & Youth Affairs.
Ia kane ka jingiakob kaba lai sngi la sdang ia ka naduh hynnin ka sngi bad ia ka phainal jong baroh ki jingiakhun la buh ban pynlong pat lashai ka sngi ka 17 tarik Risaw 2026.
Ki resol na ki jingiakhun kiba dei artad ki semifinal ba la long hynne ka sngi ki long ba ha ka kyrdan iakhun kaba 30-33 kg u Daniel Nongrum bad u Safal Thapa ki la jam sha ka phainal hadien ba ki la pynliem noh ia u Dame Syiemlieh bad Inam Vianney Nongkhlaw.
Ha ka kyrdan iakhun kaba 38-40kg u Bantei Rani bad Steven Khyllep ki la jam sha ka phainal hadien ba ki la pynliem ia u Milando bad ia u Reform Talang.
Katba ha ka jingiakhun jong ka 40-42kg u Ethan Nongdhar bad u Banlang Lyngdoh, ki la jam shakhmat hadien ba ki la pynliem noh ia u Omega Nongjri bad Jakrikra R, Mrak, ha ka kyrdan iakhun kaba 44-46 kg pat, ki rang ia kura ba la lah ban buh jaka ialade sha ka phainal ki long u Debraj Thapa bad u Shandor Kharchandi hadien ba ki la lah ban pynliem noh Chara Dechao R Marak bad ia Tangrik.
Ha ka kyrdan iakhun kaba 46-48kg pat u Florian Kharjana bad Irfan Nongrang ki la jam sha ka phainal hadien ba ki la lah ban pynliem noh ia u Kabibath bad ia u Denzil Myrthong.
Haba phai pat sha ka kyrdan iakhun kiba 48-50kg u Samha o Mulieh bad u Ariri Ch Momin ki la jam sha ka phainal hadien ba ki la pynliem noh ia u Rohan Kumar Ray bad ia u Bamekordor Majaw, katba u Rudolf Lyngdoh bad Damebala-ai Janai Ksiang ki la jam sha ka phainal hdien ba ki la lah ban pynliem noh ia u Arnav Rai bad ia u Chiangrik, ha ka kyrdan iakhun kaba 54-57kg
Haba phai pat sha ka jingiakhun ki kynthei ha ka kyrdan kaba 42-46 kg, ka Tariasa Marak ka la jam sha ka phainal da ka jingjop ia ka Samki Phawa.
Kumban shu pynkynmaw baka jingpynlong ia kane ka rynsan iakhun ka long kum shi bynta ka thong jong ka MBA ba kan lah ban lap bad shem ia ki sap ialehkai ba nylla ki khynnah shynrang bad kynthei, kiban bteng ban long ki lawei jong ka jingialehkai ia ka boxing ha kane ka jylla.
Ha kane ka rynsan iakhun ki klob kiba la mih shakhmat ban sei madan ia la ki nongialehkai ki long ka Green Heart Boxing Club, Rising Star Boxing Association, Noble Art Boxing Club, Mawshbuit Boxing Club, Upper Shillong Boxing Association.
Bad na ka liang ki district pat kiba la wan iashim bynta ki long ka Boxing Association of East Khasi Hills, West Jaintia Hills Boxing Association, Eastern West Khasi Hills District, Ri-Bhoi, West Garo Hills, North Garo Hills bad ka East Garo Hills.
