SHILLONG NAITUNG 24
U Sohtrun na Meghalaya mynta u la rung sa
ha Swiggy Instamart ha Bengaluru, ka nongbah kaba heh ha Karnataka, bad kane ka la nang pynïar shuh shuh ïa ka ïew jong une u soh na ka bynta ki nongrep ka Jylla.
La pynrung ha ka thup da ka kyrteng “u Sohtrun na Meghalaya” kaba la nang pynkhlaiñ ha ka jingpaw bad jingithuh ïa u sohtrun na Meghalaya.
Ïa kane ka sienjam la leh lyngba ka Jirang Organic Farmer Producer Company (FPC) kaba ju phah u sohtrun uba dang thymmai sha Bengaluru lyngba ka liengsuiñ kaba pyntikna ba ki nongbam ki ïoh da ki soh kiba bha bad ha kajuh ka por ka pynlah ïa ki nongrep ban ïoh ki ïew babiang ha ki jaka nongbah.
Lyngba kane, ka long ka jingleh kaba jop ha kaba ka Farmer Producer Company ka la ïoh ban ïakren ïa ka dor bad ka jingïoh kaba kham biang na ka bynta ki nongrep sohtrun ha kaba ka dor uwei u sohtrun ka long kumba T.139.
Ka jinglah ban buh ha ka rynsan khaïi ïa u sohtrun ka dei ka bynta kaba kongsan ha ka ka jingthaw lad thaw lynti ka Sorkar ban pynïoh ïa ka lad kaba biang na bynta ki nongrep.
Ki nongbam sohtrun ha Bengaluru mynta ki lah ban ïoh da kaba suk ïa u sohtrun na Meghalaya bad ki nongrep ruh ki myntoi lyngba kane ka lad ïadie ïathied
Ha kine ki khyndiat snem, ka Sorkar Meghalaya ka la pynkhlaiñ ïa ka ïew ym tsng hapoh India bad shabar ri kumjuh khamtam ïa u sohtrun lyngba ki jaka die kiba paw kum ha Delhi bad shalan ruh shabar ri kum sha ki ri Pdeng Mihngi (Middle East) nalor ka tamasa sohtrun kaba ju pynlong ha nongbah Delhi.
Kine ki sienjam ka Sorkar ki la ïarap shisha ban pynïoh ka dor kaba kham biang na ka bynta kiba rep sohtrun bad kham lah ban pynïar ïa ka jingithuh ïa u sohtrun na Meghalaya nalor ka jingpynkhlaiñ shuh shuh ïa ki Farmer Producer Organisations (FPOs).
