Shillong, Naitung 24:
U Myntri Rangbah ka Jylla, u Conrad K Sangma u la aiti ïa ki shithi mang pisa hapoh ka skhim Chief Minister’s Special Development Fund (CMSDF) sha ki kynhun bapher bapher.
U Myntri Rangbah u la leh ïa kane ha ka jingïalang kaba la pynlong ha ïingsah jong u ha Shillong ha ka 23 tarik u Naitung, 2026.
La aiti sha ki kynhun bapher bapher kiba kynthup ki shnong ki thaw, ki jaka pule, ki kynhun ïalehkai bad ki dorbar shnong ba kin pyntreikam ïa ka pisa kaba la mang na ka bynta ki jingtei jingshna ha ki shnong ki thaw bad pynjanai ïa ka jingshakri paidbah ha kylleng ka Jylla.
Kiba la ïohpdiang ïa ka shithi mang pisa ki kynthup ïa ka Synjuk Rangbah Shnong Dorbar Raid Mathan, Chibak Agalgittim Sports & Cultural Club, Laitnongrim Upper Primary School, Church of God (M&A), Sohryngkham, Rangthong Cultural Club and Sports Association, Reach Shillong Ministries, Mizo Women Welfare Society, Umpling Presbyterian Secondary School, St. Anthony’s Higher Secondary School, bad ki nongmihkhmat na ki shnong jong ki district bapher bapher.
Ka jingmang pisa ka kynthup ïa ka jingtei ïingskul bad ki kamra klas, ki Ïingdorbar Shnong, ki hall kiba lah ban pyndonkam ïa bun ki jait kam, ka jingtei ïa ki ophis jong ki seng hapoh shnong, ka jingpynbiang ïa ki jaka leit bar ha ki skul bad ki ophis paidbah, ki madan ïalehkai basketball, ki jaka saitjaiñ, ki kor um, ka jingshakri lyngba ki ambulance, ka jingthied tiar ïalehkai, bad kiwei kiwei ki jingtei hapoh ka shnong ka thaw.
Haba kren ha ka jingïalang, u Myntri Rangbah ula ong ba ka CMSDF ka dang ïai bteng ban shakri khamtam ban leh ei ei ïa ki jingdonkam kyrkieh ha ka liang ki kam pynroi ha hnong ha thaw.
U la ong ba ka Sorkar ka ïai kut jingmut ban pynthikna ïa ka jingai mar katjuh ki kam pynroi ha baroh ki District da kaba kyrshan ïa ki jingdonkam kiba hakhmat eh ha ki shnong ki thaw. U la kyntu ïa ki nongïoh bynta bad ki nongpyntrei, ba kin pynthikna ban pyntreikam bha ïa ki projek ba la mang bad ban pyndep hapoh ka por kaba la buh khnang ba ki shnong ki thaw kin ïoh ïa ka jingmyntoi kaba bun eh.
Ki nongïoh bynta ki la pynpaw ka jingsngewnguh ïa ka Sorkar namar ka jingai jingkyrshan ïa ki kam kiba pynkhlaiñ ïa ki bor shnong, ban kyntiew ïa ka pule puthi bad ki kam ïalehkai, ban pynbha ïa ki jingtei ba donkam u paidbah kaba long u synñiang sha ka roi ka kiew jong ka Jylla ha baroh ki liang.
