SHILLONG : Ka jingeh kaba la slem jong ka nongbah Shillong ha kaba ïadei bad ka jingdheng kali bad ka jingpynlong ïew paidbah ha ki lynti ïaid kjat ka la kham duna, hadien ba ka sorkar jylla ka la pynkynriah 785 ngut ki nongdie paidbah na ki jaka khaii kiba bun briew sha hynriew tylli ki jaka die ha nongbah kiba la buh kyrpang na bynta ki nongdie madan.
Katkum ka jingong ki ophisar, kane ka jingpynkynriah la pynlong hadien ka jingïakren bad ka Provisional Town Vending Committee, bad la pynleit jingmut ha ka jingmyntoi jong ki paidbah bad kumjuh ruh ka jingbit jingbiang jong ki nongdie.
Katkum ka jingiathuh da ki ophisar, kane ka jingpynkynriah ia ki nongdie madan la pyntreikam ha lai bynta hapoh ka shi snem ba la dep.
Kaba nyngkong eh ka la sdang ha Khyndailad, kaba dei kawei na ki jaka khaii kiba kham jur ka jingdheng kali ha nongbah, ha kaba 387 ngut ki nongdie la pynkynriah sha ka MUDA Parking Lot ha ka 23 Naitung, 2025.
Hadien kata, la pynkynriah ïa ki nongdie na MTC, Jail Road bad Polo sha ka Polo Hawkers Market bad ka SMB Parking Lot kaba don mar pyrshah ïa ka SBI Main Branch ha 28 Naitung 2026.
Ka bynta kaba khatduh la pyndep ha 17 Nailar 2026, ha kaba ki nongdie kiba ju die ha Laitumkhrah, Dhankheti, Malki, Barik, Laban bad Last Stop la ai jaka ha ka Brightwell Campus Hawkers Market kaba shu dep shen bad ka SMB Parking Lot ha Dhankheti.
Da kane, baroh 785 ngut ki nongdie mynta ki la ïoh jaka ha hynriew tylli ki jaka — 387 ngut ha MUDA Hawker Market, 138 ngut ha Brightwell Campus, 119 ngut ha Polo Hawker Market, 75 ngut ha SMB Parking Lot mar pyrshah ïa ka SBI, 37 ngut ha SMB Parking Lot Dhankheti bad 29 ngut ha PWD Campus, Barik.
Ki ophisar ki la iathuh ruh ba man la uwei pa uwei u nongdie uba la biang ki kyndon un ïoh jingïarap pisa kaba T.20,000 tyngka lyngba ka Chief Minister’s Urban Livelihood Grant kum ka jingkyrshan na bynta kane ka jingtreilang jong ki.
“Ka jingthmu ka long ban pynthikna ïa ka iaid ka ieng kaba paka na bynta ki kali, ban pynsuk ia ki paidbah haba ki ïaid kjat bad ban pynbeit ïa ka jingpyndonkam ïa ki jaka paidbah, katba ha kajuh ka por ruh ban ïada ïa ka jingïoh kamai jong ki nongdie paidbah lyngba ka jingïarap ban pynbiang ia ki jaka shong dukan ryngkat bad ka jingïarap pisa,” la ong uwei na ki ophisar.
