SHILLONG : U nongïalam ba rangbah ka BJP bad MLA ka Pynthorumkhrah, u Bah A.L. Hek, ha ka sngi Thohdieng, u la pynrem ïa ka jingkren jong u Symbud Myntri Rangbah ka Jylla, u Bah Sniawbhalang Dhar, kaba ïadei bad ka “jingshim kurim jong uwei pat”, da kaba ong ba kum kine ki kyntien ki phah ïa ka khubor kaba bakla sha ka pateng kaba dang khie dang san.
Haba jubab halor ka jingkren jong u Bah Dhar, u Bah Hek u la ong, “Nga la ïohsngew arsien ïa ka jingkren jong u Symbud Myntri Rangbah, Bah Sniawbhalang Dhar, bad nga la peit ruh arsien ïa ka. Um shym la kdew beit pyrshah ïa nga, hynrei u la kren ïa kane ha ka jingïakren bad ki lad pathai khubor ha ka sngi ba la dep. U la ong ‘kam lok jong me’, bad u la ong ïa kane ha ki nongthoh khubor bad ha kito kiba la ïakren bad u.”
U Bah Hek u la ong ba lada u Bah Dhar u la kren beit ïa katei ka kyntien ha khmat jong u, ka jingjubab jong u kan jin da la long da kumwei pat.
“Lada u la ong beit ha nga, nga tip ruh kumno ban jubab. Hynrei namar ba um shym la kren beit ha nga, ngam donkam ban jubab ei ei. Hynrei ka jingkren kaba la pynmih ka ïadei bad kaei kaba ngi hikai ïa ka pateng kaba dang wan,” u la ong.
U la bynrap, “Kaei kaba ngi hikai ïa ki khun jong ngi, bad ka pateng Gen Z kaba dang wan? Kumta ngi dei ban husiar bha shwa ban kren. Haba kren ha ka jingïakren ba pyni paidbah lyngba ki lad pathai khubor, ban pyndonkam ïa kum kine ki kyntien ka phah shisha ïa ka khubor kaba bakla sha ka pateng kaba dang wan.”
Haba kylli halor ka jingkren jong u Bah Dhar, u Bah Hek u la ong ba kata ka dei tang ka jingsngew shimet jong u.
