Shillong, Nailur 09 : U Symbud Myntri Rangbah ba peit ia ka tnad Kampohiing ka Jylla Bah Prestone Tynsong, ha ka sngi Balang u la kular ba ka Sorkar jylla kan shimkhia lada ka mat halor ka jingkynnoh pynbor ïa ki nongshong shnong ha ka thaiñ Langpih, West Khasi Hills, ban rung ha ka census da ki ophisar Assam ym lah ban pynbeit ha ka kyrdan ki Chief Secretary.
Ia kane u Symbud Myntri Rangbah u la kren hadien ba u la ïakynduh ïa ka kynhun kaba la pyntip ba ka don ka jingpynwit bad pynbor ïa ki nongshong shnong Khasi kiba shong harud ka khappud Meghalaya-Assam.
“Nga la dep bthah ïa u Chief Secretary jong ngi ban ïakren bad u Chief Secretary jong ka Assam, kumba ju leh. Lada kane ka mat ka palat ïa ka bor jong ki, te na ka sorkar ngin sashimkhia hi,” ong u Bah Tynsong.
U la ong ba lada donkam, ïa kane ka mat yn rah sha ki kyrdan kiba kham halor.
“Ka kyrdan kaba bud kan long hapdeng ki Myntri Sorkar, bad nangta hapdeng ki Myntri Rangbah. Nga sngewthuh ïa ka jingeh kaba shisha kaba ki paidbah jong ngi ki ïakynduh ha ka thainLangpih,” u la ong.
Haba ïadei bad ka jingdawa jong ka kynhun ban buh ïa ka temporary police camp ne outpost ban pynshngaiñ ïa ki nongshong shnong, u Bah Tynsong u la ong ba ka Sorkar kan bishar ïa kane ka jingdawa.
